MKHC-in zu chungchangah CM hnenah thu thlen

MKHC-in zu chungchangah CM hnenah thu thlen
Mizoram Kohhran Hruaitute Committee (MKHC)-in March ni 3 khan chief minister hnenah zu chungchanga Mizoram kohhrante ngaihdan an thlen.
Zu zawrh leh tihzalen hi kohhran duh dan a nih loh thu an sawi a, khuahkhirh leh khap hi an duh dan a nih reng thu an thlen a ni.
MKHC lehkha, March ni 5 zana social media lama darh a awm a, MKHC hruaitute chuan he lehkha hi an duan chhin, darh ta a nih thu leh hming ziah dik loh te pawh a awm thu, mahse chief minister hnenah hian lehkha an thehluh ngei thu te an sawi.
MKHC general secretary Rev R Lalrinsanga chuan zu khapna thlah zalen deuh tumna a awm em ni tih turin thu a thang a, chuvang chuan zu chungchangah kohhran ngaihdan hi an thlen ta tih a sawi.
“Zu tihzalen tumna a awm ti hawi zawngin thu a thang a, thuk takin kan hria pawh a ni chuang lo a. Tun sorkarah hian kan ngaihdan hi kan la thlen lo bawk a, MNF sorkarah pawh Congress sorkarah pawh zu chungchanga kan ngaihdan hi kan thlen thin a, sorkar ding laiah hian kan la thlen lo a, kan thlen ta a ni ber e,” tiin The Aizawl Post a hrilh.