Lengteng bialtu MLA Dr L Thangmawia’n a bial chhunga inchung rangva la nei lo emaw an inchung rangva thlak ngai khawpa chhe tawh, mahni suma thlak thei si lo te tana rangva an dawn theihna atana ruahmanna a siam ‘Hlunsanga Malsawmna Scheme’ hnuaiah Thawhlehni khan chhungkaw 45 tan rangva sem tur chu MLA hian a vailiam.
Lengteng bial atanga Zoram zalenna puannaa hming ziak (signatory) awmchhun, Kawlkulh khua Hlunsanga(L) hmingchawiin ‘Hlunsanga Malsawmna Scheme’ hi kumin January khan hawn a tawh a, kum thum chhung (2023 – 2025) atan kalpui chhoh tur a ni. He scheme hnuaiah hian Lengteng biala rangva inchung la nei lo leh rangva inchung tuiek chhe tawhte thlaksak tura ruahman a ni.
Hemi atana sum tul ang hi kawng hrang hranga dap a ni a, a hlawhtlinna’n VC, NGO leh Lengteng bial mipui tawiawmna a ngen tih Dr L Thangmawia hian a sawi.
Ngopa leh Khawzawl BDO leh Lengteng bial khaw hrang hrang VC-te kaltlangin he biala rangva in la nei lo chhungkaw 28 report dawn a ni a. Rangva ngaihtuah mek a nih laiin chhungkaw 17 dang luh belhin, a thawhkhatnaah hian chhungkaw 45 tan rangva bundle 4 zel pek an ni dawn a, rangva inchung la nei lote hi a zawna zawn chhuah an ni. A thawhhnihnaah rangva inchung la nei lo hmaih palh an la awm chuan pek leh an ni anga, rangva inchung tuiek chhe tawhte pawh a tahtawla tuam chhoh an ni dawn a ni.
Lengteng bial khaw 20-a in ding zawng zawng zinga rangva inchung la nei lo report dawn hi chhungkaw 50 a tling loa, heng chhungkuate hi party thliar loin tun tumah hian rangva pek vek an ni a, a rangva quality pawh tha tak a ni tih a dawngtuten an lo hre thuai dawn a ni, tiin Lengteng bialtu MLA hian a sawi. “Rangva inchung nei hmasate zingah an rangva hman quality a chhiat avanga inchung far an awm nual a, hengte pawh hi an chhungkaw dinhmun azira puih ngaite a theih chin china puih zel hi he scheme tum ber a ni,” a ti.
MLA-in inchung atan rangva sem
Get real time updates directly on you device, subscribe now.