MLA inthlan atana Kolasib inbuatsaihna CEO-in enfiah

MLA inthlan atana Kolasib district-a inbuatsaihna hrang hrang kalpui dan endikin Mizoram chief electoral officer Madhup Vyas chuan Nilaini khan Kolasib a tlawh a. MLA bial pathum – Tuirial, Kolasib leh Serlui constituency-a electoral registration officer, assistant electoral registration officer leh booth level officer thenkhatte nen inkawmin, district bawrhsap John LT Sanga, OSD to CEO Anmol Srivastava leh SP Lalrinawma Traite te an tel.
CEO chuan Mizoramah inthlanna langtlang leh felfai a awm theihna’n inthlan buaipui tura mawhphurhna neite chuan Election Commission of India-in inkaihhruaina a duan te chhiar tam turin a chah a. Kolasib district-a thuneituten electoral roll ennawnna an kalpui dan leh electoral roll rintlak siamna kawnga an hmalakna lawmawm a tih thu a sawi. Inthlang tura inbuatsaihna hmasa atan June 13 atang khian First Level Checking (FLC) of EVM kalpui tan a nih tur thu sawiin, hna tha taka kalpui a nih theihna’n fimkhur taka endik hna thawk turin a chah.
Kolasib district huamchhung ramri ah te ralmuanna leh boruak tha a awm zel theihna’n district thenawma thuneitute nen thawhhona tha nei zel turin Madhup Vyas chuan a chah a. Kolasib district-a polling station tinah hnathawh theih tura mamawh hrang hrang, ‘Assured Minimum Facilities’ awm vek tur a nih thu leh hmeichhe vote thlakna tur bik ‘Pink Polling Station’ leh polling station tha taka thuam ‘Model Polling Station’ siam tur a nih thu a sawi a. Voter zaa 85 talin vote an thlak theihna’n tan la tur leh inthlan hnuhnung bera vote tlak tlemna polling station-te zirchiang turin a chah bawk.
Thutkhawmah hian ERO, AERO leh BLO-te inbuatsaih dan sawi ho a ni a. FLC kalpuina hmun turte, EVM dahthatna ‘Strong Room’ te, vote chhiarna hmun tura ruahman ‘Counting Hall’ leh Kolasib khawchhunga polling station thenkhata hmunah a endik a. Bru voter electoral roll atanga hming paih hna kalpui dante sawi ho a ni.
2023 January 13-a final publication-a tarlan danin, Kolasib district-ah hian voter 63356 an awm a, polling station 89 a awm a. Tuirialah voter 18472, Kolasibah 23731 leh Serluiah 21153 awm anga chhinchhiah a ni.