MLA nilai lo te chu an policy kenah teh ang – ZPM corporator

MLA nilaite chu an hnathawh leh sulhnu ah, la ni lo te chu an policy kenah mipuiin teh ang u, tiin Aizawl Municipal corporator Baryl Vanneihsangi Tlau chuan a sawi.
Tuivawl bial khaw hrang hranga ZPM campaign-naah corporator Baryl Vanneihsangi Tlau chuan, politics dik tak chu kan ram leh khawtlang inrelbawlna a nih angin, chuta roreltuten ro an rel dan a dik leh dik loh te, central atanga sum kan hmuh kan hman dik leh dik loh te kan ngaihtuah tur a ni, tiin, “Party tinin candidate tha tak tak kan nei a, heng candidate-te hian eng hi nge an aupui tih kan ngaihtuah tur a ni. MLA an lo nih tawh chuan an hnathawh leh sulhnu atangin kan teh tur a ni a. Sulhnu la nei lo a nih chuan enge a sawi a, eng policy nge a ken tih kan en tur a ni. Mimal insawiselna leh inchirhthehna hian kan ramah eng hmasawnna mah a thlen dawn lo,” a ti.
Tuna kan politics hriat chu mahni chauh inhaivurna, ram leh hnam aia mahni tanghma ngaihtuahna ni bera a hriat thin thu te, kan chan ve tur leh kan hlawkpuina tur kan thlir ber nia a lan thin thu te a sawi.
State budget chu kan zavaia rualkhai taka kan chan ho tur a ni, tiin, hmasawnna rualkhai taka kan chan theih nan ZPM chuan hma a la dawn tih a sawi. “Tih bik nei, duhsak bik nei taka hmalakna a awm loh nan Village Development Committee kan din dawn a, an ni kaihhruaina hnuaiah khaw hrang hrangin hmasawnna kan mamawh ang zelin ro an rel dawn a ni,” a ti.