PC Thang Zikpuia
-- Advertisement --
Mizoram sawrkar hnuaiah ‘Mizo Language Development Board’ (MLDB) chu din fel ni tawhin, din fel a nih tirha MLDB Chairman lailâwk atâna ruat, Dr Lalzirmawia (Secretary to Govt. of Mizoram, School Education Dept.) hova February 6, 2023-a MLDB office hawnna inkhâwmah pawh khán ka tel ve nghe nghe a; Mizo tawng hum him nân leh tih hma sawn zelna tur kawnga hmâ la tak tak thei tur, hetiang ‘Board’ puitling kan han nei ve ta hi a lawmawm ka ti ve tak meuh a ni.
Chutih rual chuan ‘Mizo Language Development Board Act 2022’ (dan leh hrai) an rawn duanah hian tlêma siam rem leh deuh atâna tha tih ka lo nei ve a: section pali (4)-naah hian board member pakua (9) leh co-opted member pahnih (2) an awm tur chungchâng tàr lan a ni a. Section 13 (1)-ah leh 14 (1)-ah hian Chairman leh Secretary chu sawrkârina a dah (appoint) tur a ni tih kan hmu a; chutih lâiin notification tih chhuah atanga pisa an luah hun chhûng tur chu kum thum (3) chhûng a nih thu section 5 (1)-a an tàr lanah hian ‘all the nominated members’ tih a ni a. Heta ‘all the nominated members’ tihah hian Chairman leh Secretary ni lo zawng, co-opted member-te hi an tel ve em tih hi zawhna awm thei niin a lang a; co-opted member-te hi an tel ve a nih chuan he lâi section hi ‘all the nominated members and co-opted members’ tia dah ni ta sela, a fun kim law law zawkin ang em?
Hei bakah hian MLDB-ah hian Chairman leh Secretary leh Co-opted member-te ruat (nominate) an nih dan hi a chian angreng viau lâiin, MLDB member dangte chungchâng section 4-naa tàr lanah hian ‘appoint’ tih emaw, ‘nomination’ tih emaw a lang ve ta lo a, ‘Board-ah chuan a hnuaia member-te hi an awm ang’ tih a ni ringawt a. Hei vang hian Chairman leh Secretary leh Co-opted member ni lo, member dangte MLDB-a an tel ve dan hi a chiang ta lo deuh niin a lang a; chuvangin, mi nâwlpuiin kan hriat theih thiam theih nân leh, member-te ruat (dah) dan chungchâng hi hei âia a fiah zâwk theih nân ‘ruat’ (appoint/nominate) tih tawngkam hi ziah lan ve a tha àwm mang e tih rilruah a lo awm bawk a ni.
MLDB Act 2022 chungchânga mi thenkhat-ina an lo ngaimawh deuh chu Chairman ni thei tur chin an rawn bi thliah dan hi a ni a. He dan hian MLDB Chairman ni thei tur chuan Master’s degree nei, kum sawm nga (50) leh sawm sa rih (70) inkâr, kum sawm hnih (20) chhûng tal zirna (education) lama tawn hriat nei a tin zawn nghal niin a lang a. Hei vang hian Chairman ni thei tur chu zirna sikul leh college leh university-a thawk mêk emaw, thawk tawh emawte chauh he dan hian a tin zawn bik tihna a ni ta a. Hei vang hian he dan hi thlauh thlâk nei sa ràn leh tin zawn nei sa ràna duan chhuah a ang thei ta lek lek mai a ni.
Chuvangin, heti lo deuh hian Chairman ni thei tur hi he danin a sawi sa thiamna leh nihna…adt. hi desirable-ah hian dah tho chungin, ei zawnna kawnga Educational Institutions nena inhne hnai lem lo; nimahsela vangtlang pawhina Mizo tawng thiam leh grammar thiama an ngaih chin, Mizo tawng humhalh leh tih hma sawn kawngah pawha thawh hlâwk tak tak ni si, chûng mite tel ve theihna tur chu sub-section te khung tel leh ni sela, chutiang a nih chuan he dan hi hleih nei leh tin zawn nei bik (bias) taka duan a ang lo thei deuhin a rinawm.
Act, Recruitment Rules leh Constitution of India angah te pawh hian hetianga criteria/qualifications…adt’ chi khat ang chi chauh office luah thei anga tàr lanna hi a tlêm zâwk a ni hial maithei a; chutih laia Mizo tawng chungchânga hma lâkna tur kawnga MLDB Act 2022-ina Mizo tawng lama mi thiam a zawn chin huam chhûng erawh hi chu a zim lua deuh niin a lang ta tlat mai a ni. Hei hi sawrkar hian ngun zâwkin han en nawn leh thei sela, siam that leh deuh ngâi a awm a nih chuan khúa a tlai hmâ hian sìam that leh ni ta sela, chu chu nakin zel atân thil tha tur zâwk a nih a rinawm a ni. Chu bakah chuan he danin ‘education’ a sawi hi definitions-ah hian hei âia chiang deuh zâwk hian dah theih ni bawk se a tha ngawt ang le.
Eng pawh ni sela, Mizo tawng humhalh leh hma sawn zelna tur kawnga hmâ la tak tak thei tur Board puitling kan lo nei ve ta hi a ropuiin, a lawmawm tak meuh a. Tuna Chairman leh Secretary leh Co-opted member-te pawh hi mi thiam leh mi duhawm tak tak vek an ni a, a thlamuanthlak tak meuh a ni. Chutih rual chuan nakin zela kàl phung tha zâwk a awm theih beisei avanga chauha he thu hi rawn ziak ka ni a; MLDB hi Zo fate tân tawng chungchânga Board rin tlâk a nih zel theih nâna ka thahnem ngaihna thuhla a ni e.