Israel-in al-Shifa chhuahsan

Israel military te chuan karhnih chhung military operation an neih hnuah leh hospital complex tam zawk an tihchhiat tawh hnuah Gaza City a al-Shifa hospital chu an chhuahsan tawh thu an sawi.
Israel Defense Forces (IDF) te chuan sipai te chuan terrorists an that teuha damdawi in huam chhungah ralthuam tam tak leh intelligence documents te an man tiin an sawi bawk.
Hamas te chuan al-Shifa damdawi in chu Israel beihna hmunpu atan a hmang tia sawiin Israel chuan ti lo tura nawrna nasa tak karah a luhchhuah a ni.
Kar hnih chhung chu damdawi in leh a chhehvelah inkahna leh inbeihna nasa tak a thleng reng a. IDF te chuan Thawh tanni khan Shifa Hospital leh a chhehvelah operational activity an zo fel tawh tiin an chhuahsan tawh thu an sawi a.
“Firfiak te tihhlumin an awm a, ralthuam tam tak leh intelligence documents te hospital ah hian hmuh a ni a, damlote tana tawrhna a thlen loh theih ang berin chetlak a ni” tiin IDF thuchhuah chuan a sawi.
World Health Organization (WHO) chuan al-Shifa damdawi in ah kar hnih chhungin damlo 21 in nunna an chan tiin a sawi a, chutihlai chuan Israel Prime Minister Benjamin Netanyahu thung chuan firfiak 200 chuang tihhlum an ni a ti ve thung.
Israel sipaite chuan 18 March khan al-Shifa damdawi in luhchhuah bul an tan a, an luhchhuah hma in civilian te chu insaseng turin an ngen lawk thung a ni.
Israel chuan tun hma atang tawhin Hamas te chu civilian health infrastructure te cover a hmangah a puh tawh a, hei hi Hamas te chuan an hnawl thung.
Israel ten damdawi chhuahsan tur thu an sawi hmain Dr Tedros Adhanom Ghebreysus chuan al-Shifa chhungah mi 100 chuang la awmin eitur leh tui in tur bakah damdawi an nei lo a ti a.
Mahse Netanyahu thung chuan al-Shifa chu firfiak te bupui tia sawiin Israel sipai tena awmze nei leh him taka an luhchhuah thei chu a fak thu a sawi thung.
Hetih lai hian Israel ram chhungah Hamas tena Israeli mi tâng an kawl te chhanchhuah an la nih loh zelah Benjamin Netanyahu sawi selna nasa tak a awm thung.