MNF Block OB-ten min bum – KARDU

State Transport Authority-in Kolasib town-a tlan tur auto rickshaw permit 112 pekchhuah thar a tum duh loa hma an laknaah Kolasib MNF Block hruaituten an hnena an intiamna ang niloin thil kalpui a ni leh si tih auto rickshaw-a eizawng mekte chuan an sawi.
Kolasib Auto Rickshaw Drivers’ Union (KARDU) leh Kolasib District Auto Rickhsaw Association hruaitute sawi danin, RTI hmanga zawhna chhannaah Congress sawrkar term hnuhnung zawk 2013-2017 chhung khan Kolasib tan auto permit 147 pekchhuah a ni a; kum 2018 -2023 chhungin permit 180 pek niin, 180 zinga permit 112 chu tuna cancel turin an nawr lai hi a ni.
Kolasib town-a tlan mek auto registration ti zawng zawng hi 388 a ni a, tunah 112 a awm belh chuan 500 chiah a ni tawh ang. Hetih lai hian taxi (car) 160 vel a awm a, hei hi 41-in a tam belh ang. Two wheeler taxi 93 awm belh tur nen Kolasib town-a passenger phur lirthei awm tur zawng zawng chu 794 a ni.
KARDU-in auto permit 112 pek thar tum cancel tura nawrna atan ni 7 chhung Kolasib DTO office staff-te hna thawk thei loa an dan hnuah bawrhsap chuan an duh ang tihpuitlin a nih theihnan Secretariat lama bawhzui a tum thu a sawi avangin lungawilohna an lantir chu an titawp lailawk tih an sawi a. An beisei ang thu lawmawm an hriat loh avangin September 11 atangin bialtu MLA K Lalrinliana chenna in kawtah sit -in- demonstration neih an tum mek laiin, MNF Block hruaituten an thiltum chu thulh tura ngenin, “Inthlan kum a ni a, permit zawng zawng cancel theih chu rinawm loh mah se, chhungkaw khat atanga permit hmu kawp, sawrkar hnathawk, neinung zawkte chu cancel turin hma kan la dawn nia,” an ti niin an sawi.
Patling leh patling an indawr a, ring tawk tura MNF Block president-in a tih laiin, anmahni ring tawk taka an inthlah hnu lawkah DTO-in permit hi a pechhuah leh si a, patling leh patling an inbum chiang hle tih an sawi.
Auto permit pek chhuah hrim hrim lam niloin, an dodal ber chu, tum khata permit tam tham tak pek chhuah, eizawnna atana hmang tur ni lo, thenkhat phei chu permit hralh tum nghalte hnenah pek chu an duh lo tih KARDU hian an sawi nawn a. Permit hi hralhchhawn phal a ni lo chungin, tuna an pekchhuahah pawh social media-a ualau taka zuar nghal te an awm tih an sawi a ni.