MNF hi Zofate zalenna famkim neih hma min hruai tura Pathian min pek – MNF Thalai V/P

Zofaten zalenna famkim kan neih hmaa Mizo mipui min hruai turin Pathianin MNF min pe tih MNF Thalai vice president Zodinpuia chuan a sawi.
Thawhtannia MNF office Mizo Hnam Runa inkhawmah Zodinpuia chuan Mizoram chu Pathianin Zofate Jerusalem ni tura a din a ni a. Zohnahthlak rorelna pakhat hnuaia kan awm leh theihna’n hnama min dintu chuan kawng min ruahmansak mek a ni, tiin, “Zofaten zalenna famkim kan neih hma loh chuan MNF chu Mizo mipui min hruai tura Pathian min pek a ni,” a ti.
India ramah political party hrang hrang awmin, hmalak dan pawh a inang lo hle a, mipui tana tha ber tur MNF chuan a ngaihtuah thin tih a sawi. Mizoram political party hrang hrang zingah MNF aia hruaitu nei tha an awm lo tih a sawi a; Congress, ZPM leh BJP hotulute hi hun rei tak MNF-a lo awm tawh, nihna leh chanvo thlakhlelh avanga political party hrang hranga awmkual tawhte an ni tih sawiin, “An party awmnaah theuh MNF hmalak tawh chu hmuh thelh luiin a chhe ber ang maiin kan hotulute an mawhpuh a, hei hi mipui rilru a ni lo zawnga hruaikawi theihna a nih avangin ching tam tawh lo se kan duh hle,” a ti.
Mizoramah party thenkhatin inchirhtheh na’n kohhran/ khawtlang inlungrualna tichhe thei zawnga thusawi an awm zeuh zeuh thin niin MNF Thalai vice president hian a sawi a. Hei hi thalaiah hnam chungchang thlenga nghawng thei thil a nih avangin thudik ziktluak lo sawi tawh lo turin a duh tih a sawi a ni.