MNF-in Zoram zalenna a sual tan champha, Mizo National Day chu March 1 khan hman a ni a. MNF senior vice president Tawnluia chuan zalenna puan hi Mizo hnam pumin an thlawp tih a sawi.
Mizo National Day vawi 57-na hmanna pui ber Aizawla MNF office – Mizo Hnam Runah MNF senior vice president chuan MNF hruaitu hmasa mi 61 ten 1966 March 1-ah Mizo hnam zalenna turin independent an puang a. Mizo hnam pumin an thlawp tih a sawi. A tih puitlinna turin lu chhum ban chhum huamin an lo bei tawh a. Mizo hnam dinchhuah zelna’n, kan kal zelna kawnga chakna thar kan lakna tur a ni, tiin, political solution erawh Zoram mipui duh danin India nen inrem a ni ta tih a sawi.
MNF chu Mizo hnam kaihruai turin Pathianin an thiam leh thiam loh, an fin leh fin loh lam chhut loin a dah niin Tawnluia hian a sawi. “Mizo hnam tana din leh ding a nihna hi MNF ropuina a ni. Mizo hnam hmahruaitu leh hnarkaitu kan ni a. Pathian leh kan ram tan, tiin zalenna neia rorelna pakhat hnuaia awm leh Kristian kan nihna vawnhim chu a din chhan a ni. Kawng laklawhah min kalsan dawn lo,” a ti.
Hnam tana martarte chu kan hnam kalzelna tura nun hlan te an nih angin, hnam martar-te rual zelin an kal dawn tih a sawi a. Zohnahthlak hrang hrangte rorelna pakhat hnuaia awm chu an duh ber, MNF nationalism laimu pakhat a la ni reng tih a sawi bawk.
Mizo nationalism a la nung reng tih deputy chief minister Tawnluia hian sawiin, “Assembly Session neih zawh takah ruling leh opposition MLA ten Uniform Civil Code duhlohna lungrual takin pass a ni a. Hei hi kan thinlungah nationalism spirit a awm tlat tih tichiangtu a ni,” a ti.
MNF vice president Vanlalzawma chuan Mizo National Day chu Mizoram independent puan ni a ni, tiin, “1966 March 1-a ram leh hnam tana penchhuak ho rilru kha hrereng ang u,” a ti. MNF danglamna leh tun thlenga Pathian hruaina an chan chhan chu, hruaitu hmasaten independent an lo puan vang niin a sawi.
MNF-in Mizo National Day hmang Hnam pumin min thlawp – Tawnluia
Get real time updates directly on you device, subscribe now.