MNF-in ram hralh an tum ZPM chalah phung a tawp – TT Zothansanga

MNF-in ram hralh an tum
ZPM chalah phung a tawp
– TT Zothansanga
Indian Air Force hnenah MNF party-in mipui hriat lohin ram chu hralh an tum ngei a, a titawp theitu ZPM-in an tihtawp bik loh avangin an chalah phung a tawp thung tih Congress hruaitu TT Zothansanga chuan a sawi.
Thawhtannia Congress Bhavan inkhawmah MPCC Political Affairs Committee member TT Zothansanga chuan, press conference-ah Revenue minister khan MNF-in an kui a, an phun a, tui an leih, tia a sawi bakah chief minister-in notesheet ah, ‘a nih angin kalpui ni tawh mai se’ tia a ziah thu a sawi bawk tih sawiin, “Thil dik lo a ni tih hrereng chung khan an siamtha ngam ta lo nge,” tiin a zawt.
He ram inlei danah hian preliminary notification chhuah atanga pawisa inpek inkar hi ni 70 a ni tih a sawi a. Minister-in press conference-ah CM approval lak atanga ni 9-na 01.08.2025-ah compensation award approve-in, hemi ni vek hian Aizawl DC chuan order of possession of land a chhuah zui ve ta nia a sawi thu sawichhawngin, operational lease leh compensation award chu a inanglo tih a sawi a ni.
Revenue dan ang thlapa a hawh a hawh (land lease) turin ruahmanna an siam ta zawk nia Pu B Lalchhanzova sawi chungchangah MPCC hruaitu chuan, “Lease a nih dawn chuan Mizoram Public Investment Board-in a recommend a ngai. Mizoram (Land Revenue) Rules 2013 (Rule 3&4) sawi danin ram bigha or sq.m. 80265 chung lam chu thil bik (exceptional case) ah leh sawifiahna pawmawm mumal tak a nih hnuah MPIB-in a recommend anga, terms & conditions No. 3 (a) naah lutin 99 years chhungin lease a pek theih a ni,” a ti.
Ram hralh chungchangah hian MNF hmalakna leh hnuhma vek angin ZPM-in an sawi tih sawichhawngin, acre 138-a zau cheng vbch. 248 in, NOC pawh MNF hunlaia pek fel vek tawh thu sawi a ni, tiin, ZPM hunah vbch. 50-a tihniamin, vbch. 198-ah an tla thla a, hetia an tlak thlak hian, MNF-in bei ngam lo tur anga ngaiin, a chaka chakin an kalpui ta mai em ni tih chu thil awm thei a ni tih a sawi a ni.
“MNF khan mipui hriat loha hralh chu an lo tum khawp mai a, ni 18.07.2019 leh 26.09.2019-ah khan IAF hnena outright purchase turin an ti a. Revenue dan thui tak an kal kan ngei tih pawh hmuh a ni. ZPM hian hralh ta loin lease tur angin an sawi a, CM Pu Lalduhoma’n MNF hruaituten an hlawkpui tura ngaih theih turin a sawi a. Tunah amah leh a thawhpuite mipuiin an tinzawn ve thung a, insawifihlim an tumna lamah Pu Lalnunmawia Chuaungo hming an lam a, a ni ang midik chu an thlim hneh hle ang tih a rin theih,” TT Zothansanga hian a ti.
ZPM leh MNF-in CBI chhui an cho a, Congress pawh FIR thehlut turin an phut tih sawiin, sawrkar tha leh felfai an inti a nih chuan he ram inleina hi anmahni ngeiin CBI chhuitir se a inhmeh hle dawn tih a sawi a ni.