MNF party chuan India ram puma Uniform Civil Code hman tuma hmalakna chu tha an ti lo a, Mizoram State Legislative Assembly pawhin duhlohna pass tum nise an ti.
-- Advertisement --
MNF Legislature Party (MLP) chu chief minister Zoramthanga hoin Thawhtanni khan an thukhawm a. MNF sawrkar kal mek hmalakna hrang hrangte thlir hoin February 7-a tan tur Mizoram Assembly Budget Session chungchang an thlirlawk bawk.
Uniform Civil Code hmang tura hmalakna awm mek chu tha an ti lo tih MLP hian sawiin, tun Assembly Budget Session neih turah lungrual taka UCC duhlohna pass dan kawng dap nise an ti.
MNF sawrkar flagship programme, SEDP chungchang an sawi a. SEDP first phase-ah chhungkaw 60000 hnenah first instalment chu a dawng tur chhungtin hnenah Rs. 25000 zela pekchhuah a nih tawh thu leh second instalment pek leh tur pawh sanction a nih tawh thu te, a tahtawla semchhuah thuai a nih tur thute sawi a ni a. Heng chhungkaw 60000 pek mek bakah sawrkar kumthar, 2023- 2024 ah chhungkaw dang tam tak, second phase leh third phase thlenga thlan belh leh tur chak taka hma lak nise, tiin a rel.
Inkalpawhna kawngpui tha zawk Mizoram mipuiin kan neih theih nan MNF sawrkar tirh atanga theihtawp chhuah a nih thu sawi a ni a, nasa zawka tan lak chhunzawm zel turin rel a ni.
MLP hian Assembly deputy speaker thlan tura an candidate atan Lawngtlai East bialtu MLA H Biakzaua chu lungrual takin a pawm a ni.