Mizoram hmun hrang hranga ramdang atanga lakluh kuhva ro chhekkhawl mek zat chu sawrkarin a chhiar dawn a. Kuhva rah chawpa kudam kalh a nih theih nan hma a la zui dawn.
-- Advertisement --
Dan loa kuhva tawlhruk tihtawp theih dan ngaihtuah tura din – Task Group on Illegal Arecanut chu Thawhtanni khan an chairman, Home commissioner & secretary H. Lalengmawia kaihhruaiin an thukhawm a. Myanmar leh ramdang atanga danloa Mizoram/ India-a kuhva lo lut dang tura hmalakna tihchak lehzual dan tur sawi a ni a. February thla chhungin district hrang hranga danloa lakluh kuhva chhekkhawl (stock) awm zat khawnkhawm nise an ti.
Hetihlai hian kudam hrang hranga danloa kuhva awmte a kudam chawpa kalh (seal) leh dan anga hma lak a nih theih nan Task Group-in Customs department-ah report a thehlut anga, February thla chhunga report hmuh belh pawh Customs-ah report a ni leh ang.
Mizorama checkgate-te tun aia chak lehzual leh awmze nei zawka an function na’n police-in hma an la ang, tih te; a theihna leh tul apiangah Central YMA-in branch hrang hrang kaltlangin police an tanpui ang, tih leh, Task Group-in hma an lak zuina turin hmun hrang hranga dan loa kuhva chhekna kudam awmna LSC/VC pass kimchang takin DC-ten Home department-ah an report ang, tih te rel a ni.
Task Group chuan danloa kuhva sumdawnnaah hian tumah inhnamhnawih lo tur leh inhnamhnawih awmte pawh rang taka tawpsan turin a hriattir tih a sawi.
Thutkhawmah hian Home department, Mizoram Police, Law & Judicial Department, CYMA, Assam Rifles, Border Security Force leh Directorate of Revenue Intelligence (DRI) hotute an tel a ni.