MNF leh MKHC-in UCC hman duh loh thu thlen

Mizorama sawrkar lai party Mizo National Front chuan Uniform Civil Code hman an duh loh thu sawrkar laipui hnenah an thlen a. Mizoram Kohhran Hruaitute Committee pawhin an duh loh thu hi an thlen tawh bawk.
MNF president, chief minister ni bawk Zoramthanga chuan July 4 khan Law Commission of India hnenah UCC hman an duh loh thu hi ziakin a thlen a.
Law Commission-in kumin June 14-a mipui hriattirna a chhuahah NDA sawrkarin India ram pumah UCC hman a tum tih a lang tih sawiin, ‘UCC chungchang hi ni 14.2.2023 ah Mizoram State Legislative Assembly-ah Home minister-in official resolution pulutin, sawiho a ni tawh a. Hnam leh sakhaw tlem zawkte kalpui dan leh hmasang atanga tih dan phung an lo neih tawhte tihbona tur hmanrua a nih avangin, hemi ang hnam leh sakhua, Mizote pawh nghawng thei a nih avangin, ram mipui inpumkhatna tichhe thei thil, UCC hman tuma hmalakna hi engti kawng pawha dodal nise, tiin an lo pass tawh tih a thlen a ni.
MNF party chu NEDA (North East Democratic Alliance) a tel, ram mipui nawlpui thatna tur thil leh, a bikin hnam leh sakhaw tlem zawkte that tlanna tur a nih phawt chuan NDA sawrkar policy leh programme te a theih ang anga thlawp tur zing ami a nih rualin, UCC erawh hi chu ram mipui nawlpui emaw hnam leh sakhaw tlem zawkte tan that phahna tur awm lo a nih zawk avangin, hetiang ngaihdan hi State Assembly pawhin a lo nei ta reng a ni, tih a thlen a bawk.
MNF leh India sawrkarin kum 1986-a inremna thuthlung ziahin a hrinchhuah, ram danpuia Article 371-G ah, Mizote sakhua leh hnam tih phung tidanglam thei thil a awm a nih chuan, Mizoram Legislative Assembly-in a pawmpuina a awm phawt loh chuan hman ve theih a ni loang, tih dah a ni angin, UCC hi Mizote sakhaw vawn dan leh hnam kalphung tidanglam thei a nih avangin, danpuiin a humna ang zulzui hian India ram puma kalpui tur chuan MNF-in a pawm thei lo tih a thlen a ni.
July 3 khan Law Commission of India hnenah tho hian Mizoram Kohhran Hruaitute Committee (MKHC) pawhin UCC an pawm theih loh thu leh hman an duh loh thu hi an thlen a. An ni pawhin ram danpui Article 371-G a Mizo hnam leh sakhaw humhalhna dan, State Assembly-in a pawmpui a nih loh chuan Parliament-in dan hman tur a tuk pawh Mizorama hman ve ngawt theih a nih loh thu hi tlawhchhana hmangin, ram puma UCC hman tuma hmalakna chu tawpsan leh turin an ngen tih an thlen a ni.