Raltlan tan MNYF luangchhuak

Manipur buaina avanga Mizorama sahimna zawnga tlanchhia, hmun hrang hranga relief camp siama awm mekte chu MNF Thalai chuan chhawmdawlna a hlan mek.
Thawhlehni khan a thawhkhatna atan Tuirial Airfield Venga raltlante khawsakna hmun an tlawh a, he hmunah hian mi 115 vel awmin, an zinga 60 vel chu naupang an ni.
MNF Thalai Hqrs. vice president Zodinpuia chuan Manipur-in ralthuam aia a mamawh hmasak chu remna a ni, tiin, remna leh muanna a awm theihna tura sawrkar laipui hmalakna leh Manipur sawrkar chetdan erawh an duh khawp lo hle tih a sawi. Nunau mangang inhumhimna zawnga Mizoram belte riltama an awm lohna’n sawrkar, tlawmngai pawl leh kohhranten theihtawp an chhuah tih a sawi a ni.
Manipura Zohnahthlak unaute kiangah MNF a ding reng tih Zodinpuia hian sawiin, Mizoram sawrkarin raltlante puala central lama grant a dil pawh engmah la hmu rih lo mah se, Mizorama an awm chhung chu an nghei dawn lo tih a sawi a. “Khawvel hriatah hnam anga kan dam khawchhuah theihna’n tuna harsatna kan tawh hian lungrualna tlangah Zofate min hruaikhawm se tih hi Mizo mipui beisei leh duhthusam a ni,” a ti.