Thla khata cheng khat hlawh OSD to Chief Minister a ban hnu ah police-ten kuhva rah ro an man ta teuh teuh mai niin Congress MLA Zodintluanga chuan a sawi.
-- Advertisement --
Zirtawpnia Lunglei Congress Bhavan-a Lunglei District Mahila Block Conference cum Political Training neih a hmanpuinaah MPCC treasurer Zodintluanga Ralte chuan Mizoram sawrkarin officer tha leh fel tam tak a neihte a rin zawh loh vang nge, chief minister Pu Zoramthanga chuan a thachhang dawltu atan mipui tam zawkin kan la hmelhriat ngai loh leh mak tih em em, thla khata cheng khat hlawh turin officer on special duty (OSD) to Chief Minister hun rei tak a ruai a. MLA inthlan kum leh MNF atanga an mi leh sa ban runpui a thlen tak avangin, loh theih lohin tunhnaiah an inbantir thei hram, tiin a sawi.
“OSD to CM cheng khat hlawh khan hna a thawh chhunga sum a hmanral leh Mizoram tana a hnathawh hmel inthlauhna kha lei leh van ang a nih a rinawm. Cheng khat hlawh OSD a ban velah kan police-te pawhin kuhva rah ro an man ta teuh mai,” a ti.
MNF chhungkuaah intentawnna leh inrinloh tawnna a thlen mek avangin ban hri a leng nasa hle tih Congress MLA hian a sawi a. An MLA leh minister te zingah bang mai tur pawh an la awm a rin thu sawiin, “A hnuhnung hnung phungin seh tih ang maiin, a chimin an chim mek,” a ti.
Chief minister leh MNF president ni bawk Pu Zoramthanga chu state nih hnua MLA term awm tawh zawng zawngah, khawvel taka chhut pawhin mithiam chungchuang leh fel tak tak MLA ngah ber a nih a rinawm tih a sawi a. Mithiam tam tak nei chungin a minister zinga sum lama thluak chak fal bik takte bakah Kamrul-a leh Abu Mazumdar-a tihte thawhpui nuam a ti zawk nia a lan thu a sawi.
Kalphung thar auhlaa hmangtute chu an hruaitu lawkte rilru chhungril inhlat tak tak a nih avangin, an zawrhkual mek leh an auhla chu hralh a tla lo hle tih Zodintluanga hian a sawi a. Chu party chu puakdarh mai thei dinhmuna ding reng an ni, tiin, “Thenkhat phei chuan bel-keh phuarkhawm nen an tehkhin hial a ni,” a ti.
Congress party chu party ruhrel lian leh inrelbawlna felfai tak nei an nih thu leh, tunah hian khawtinah nasa taka an insangmar mek thu MPCC hruaitu hian a sawi bawk.
MPCC Mahila president Vanlalawmpuii Chawngthu chuan Mizorama hmeichhe pawl hrang hrang, MHIP leh pawl dang, hmeichhe dinhmun siamthat leh humhalh duhte thiltum leh beisei tihlawhtlungtu chu Congress sawrkar a ni, tiin, “Hmeichhe qouta a bika siamsak a, duansaktu pawh Congress party a ni. Hmeichhiate himna leh hamthatna zawng zawng min siamsaktu chu Congress a ni,” a ti.