Mizoram rorelna in sang, pawimawh leh zahawma hnathawktu lak danah fel tawk lo leh thil tenawm tak awm anga lang chu pawi an tiin, MNF sawrkar hnuaia zirlai leh thalaite beidawng hmel hmuh hrehawm an tih thu Congress Thalai chuan an sawi.
Congress Thalai Hqrs. thuchhuak chuan, Assembly Secretariat-a thawktu lak chungchanga zirlai pawl hrang hrangte hmalakna July 7 zinga Assembly House kawta zirlai pungkhawmten resolution an pass, Mizoram State Legislative Assembly Secretariat hna lak cancel leh recruitment rules thar hnuaiah hna lak an phut chu a thlawp bakah he hnalak an cancel hmaa zirlaiten hma an lak chhunzawm zel turah pawh zirlaite a thlawp tlat dawn tih a sawi.
‘Chief minister awm laia deputy chief minister department enkawl mek hnuaia cheng nuai 100 chuang a hmanna awm loa ziahral a awm thu hrilh ngamtu leh minister-te an department chan theuh uluk taka vil tura fuih ngamtu, Assembly speaker Pu Lalrinliana Sailo enkawl Mizoram State Legislative Assembly Secretariat hnuaia diklo taka thawktu engemawzat lak a ni hi pawi kan ti a. MNF sawrkar chief minister Pu Zoramthanga kaihhruaina hnuaia minister leh MLA te bakah Assembly speaker hian anmahni thlan an inlaih zawh sak tawhah kan ngai a, tun thla li awm tur chhung hian chhilhboin an awm dawn tih a langchiang hle tawh a ni,’ a ti.
MNF sawrkarah zirlaite bei- dawng hmel hmuh a hrehawm – Congress Thalai
Get real time updates directly on you device, subscribe now.
Prev Post
Next Post