“Thalaite an beidawng nasa tawh”

“Thalaite an beidawng nasa tawh”
Mizo thalaite an beidawng nasa tawh a, hetiang reng a nih chuan ram dinhmun tur hriatthiam a har, tiin ZPM Political Affairs Committee member R Lalthansanga chuan a sawi.
Zirtawpnia an party office-a political session-ah ZPM PAC member chuan khawvela mi hlauhawm ber chu mi beidawngte an ni a, beidawn chuan tih hreh an nei tawh lo, tia sawiin, “Mizo thalaite hi tun dinhmunah an beidawng nasa tawh em em a, hetiang renga kan kal chuan kan ram dinhmun tur hi hriatthiam a har tawh hle. Kan hmabak thim tak hi ZPM hmanga siamthat a, vote hmanga ram kan chhanchhuah a ngai,” a ti.
MNF leh Congress sawrkar ang siam an tum loa, kan ram an kaihhruai dana mi beidawngte tan beiseina thar siamsak turin ZPM chuan vote hmanga ram chhanchhuak turin mipui an sawm tih a sawi a. “Mipui sawrkar siam kan tumna kawngah hian ramhluiah kan la inthlang dawn a, hmabak hautak tak kan la hmachhawn dawn. Kan khingpui turte hian policy mumal an nei ve dawn loa, sum hmachhuanin an rawn che ngei dawn,” tiin R Lalthansanga hian a sawi bawk.
ZPM Thalai president Dr Lalrammawia chuan SEDP hmangin MNF-in mipui an huikhawm a, an thinlung an lei tel loh avangin chu’ng mite chuan inthlan hmain ZPM an pankhawm dawn tih a sawi. Tunhnaiah chanchin duhawm lo tak, Assembly Secretariat staff lak dan buangbar leh fel lo chuan thalaite rilru a tihnual hle tih sawiin, “An tih dik loh hi siamtha in cancel ngei se kan ti a ni,” a ti.