MNF sawrkarin district 8 tipuitling – Dr R Lalthangliana

MNF sawrkarin district 8 tipuitling
– Dr R Lalthangliana
Mizorama district 11 awm tawh zinga 8 chu MNF sawrkar laia tihpuitlin vek a ni tih minister Dr R Lalthangliana chuan a sawi.
South Tuipui bialtu MLA, minister Dr R Lalthangliana hian Zirtawpni khan Hnahthialah District Sericulture Office thar leh DCSO office thar a hawng a. District thar pathumte hi a kum 4-na champha a nih tawh thu tarlangin, District thar neih hi a namai lo hle tih a sawi. “Kum 1998-ah MNF a sawrkar hma zawng khan Mizoramah district pathum chauh kan nei a. 1998 chawhnu lamah Lawngtlai, Serchhip, Champhai, Mamit leh Kolasib district hi Congress sawrkar khan a thu ringawtin a puang a. 1998 kumtawpa kan sawrkar khan kan ngaihtuah hmasak ber zing ami a ni. A rualin district thar 5 kha pangngai takin kan hlawhtlin tir vek a. DC office kan sa fel deuh vek. District thar hian a kentel hi a hrawl hlawm hle,” a ti.
2008 MNF sawrkar tawp dawnah mipui nawrna a nasat avangin Hnahthial, Saitual leh Khawzawl district an puang a, an tla leh ta si a; Congress sawrkarin theihtawp chhuah ve mah se, kum 10 chhung khan a tipuitling thei lo a. Kum 2018-a MNF a sawrkar tantirh khan vanduaithlak takin deputy chief minister damlohna in a tlakbuak a, chief minister-in bawhzui tura a tih angin theihtawp a chhuah ve a. Pu Zoramthanga kaihhruai sawrkar chuan sawrkar atanga thla 8 chhung (2019 August 15) ah fuke kim takin a tipuitling nghal vek tih Dr R Lalthangliana hian a sawi a ni.
Mizorama lei sei ber zing ami tur Darzokai lei, truck ke 14 nei insulpel theihna tur, cheng nuai 9100 senga dawhna turin Delhi a kal hnuhnun berin BRO chief engineer a hmu a, tender an ko tawh a, kum hnih chhung leka an dawh zawh theih tur thu a lo hrilh tih a sawi a. Hnahthial district-a power supply chhe lutuk siamthatna turin a tahtawl te tea hman turin SASCI atangin cheng nuai 4200 an ruahman tawh thu a sawi bawk.
Thingsai to Bualpui kawng black top tawh sa bakah Saisihchhuah (Pang khua) km.20 vela thui siamna’n Ministry of Defence a dawr a, helai hmun hi India leh China indo palh ta se, India tan hmun pawimawh tak a nih tur thu a hrilh chu an lo ngai thutak hle a, a thawhna turin cheng nuai 11100 an dahfel sak tawh tih minister hian a sawi a ni.