Mizoram sawrkar chu ramri buai chinfel tum loin, mipui bumna atan chauh hma a la tih BJP Mizoram Pradesh vice president R Vanramchhuanga chuan a sawi.
-- Advertisement --
Thuthar thehdarhtute a kawmnaah BJP Mizoram vice president chuan, Assam chief minister Himanta Biswa Sharma chuan Pu Zoramthanga sawrkar dinna a hrechiang hle a, Assam Police-ten Mioram chhunga an duh duh na hmunah camp siamin an awmchilh bakah lo leh huante an luah luih sak tih a sawi.
Mizoram Home minister chuan Assam sawrkarin Mizoram an lak an hriat loh thu sawi mah se, Assam Legislative Assembly ah Assam chief minister-in inti thei takin Mizoram acre 1800 an lak thu a sawi tih R Vanramchhuanga hian a sawi a ni.
Ramri buai chungchanga Assam leh Mizoram minister-te inbiak vawi 3-na joint statement an siam, point khatnaa Mizoram sawrkarin Mizoram chhunga rin luh an duh chin ram, khua leh a chhunga chengte leh sawi tur dang awm apiang thla thum chhunga inbuatsaih fel turin Mizoram sawrkar kutah mawhphurhna an dah tih BJP hruaitu hian a sawi a. Inbiak atanga thla hnih ral hnuah Mizoram Home minister hoa Boundary Committee an koh chauh thu te, chu Committee chuan Mizote luah chin ram leh tul dang awm apiang chhui tur Study Group din an rawt thu te sawiin, “Vawiin thlengin Mizoram sawrkarin notification pawh ala ti chhuak lo,” a ti.