National highway four lane laih hna thawh turah Vairengte leh Kolasib inkarah mi 480 hnenah compensation cheng vaibelchhe 281.73 semchhuah a ni tawh.
-- Advertisement --
Parliament Session neih mekah Mizoram Rajya Sabha MP KVanlalvena zawhna chhangin Union Minister of Road Transport & Highways Nitin Jairam Gadkari chuan Mizoram hmun hrang hranga NHIDCL hnuaia kawng laih hna thawh mek leh a kaihhnawih pawimawh ziaka a chhannaah, Silchar – Aizawl four lane laih bul tan mekah Vairengte leh Kolasib inkarah mi 480 hnena compensation pek tawh chu cheng vaibelchhe 281.73 a ni a. Kolasib – Sairang inkar compensation erawh tihfel a la ni lo.
Union minister chhan danin, Silchar – Aizawl four lane kawng laih tur hi package 8-ah then niin, package hnih chu Assam NHIDCL kuta dah a ni a; package ruk chu Mizoram NHIDCL kuta dah a ni thung. Mizoram chhung package li ah hnathawk tur contractor thlan tawh niin, cheng vaibelchhe 2369.35 sanction a ni. Kawnpui – Sairang package hnih chu detail project report siam mek a ni.
Mizoramah two lane kawngpui thlur li laih mek a ni a. Aizawl – Tuipang km.380 a thui cheng vbch. 7280.95, Aizawl – Imphal via Ngopa two lane road km. 98.57 a sei cheng vbch. 1517.60, Seling – Champhai km. 119.95 a thui cheng vbch. 2279.74, Lunglei – Tlabung two lane road km.74.95 a thui cheng vbch. 1439.03 chu NHIDCL hnuaiah contractor hrang hrangten an thawk mek tih a sawi.