MNF tan sawrkar hnathawk an campaign nasa – Nirupam Chakma

Chakma Autonomous District Council inthlanah MNF party tan sawrkar hnathawkte an campaign nasa hle tih BJP National Council Member Nirupam Chakma chuan a sawi.
Thawhtannia an party office-a inkhawmah CADC-a BJP MDC ni bawk Nirupam Chakma chuan CADC inthlanah MNF tan sawrkar hnathawkte an campaign nasa a, dan palzutin an campaign a, an ni tan chuan hnehna chan har tak a ni tih a sawi. Dan dikloa an kalpui thin avang hian CADC inthlan chu dik taka hma la duh tan chuan hnehna chan har tak a ni tih sawiin, “Mipuiin kawngpui tha, kawlpheta tha an mamawh tih an hre pha tawhlo thin a, mimal hamthatna tur ringawt an buaipui phah thin. CADC ah hian BJP-in hnehna kan chan theihna’n theihtawp kan chhuah leh dawn a, mipuiin development awmzia an hriat a, retheihna bawih ata hruaichhuah kan nih theihna’n hnehna chang turin kan campaign leh dawn a ni,” a ti.
BJP Mizoram State president Vanlalhmuaka chuan BJP-in Karnataka inthlanah hnehna an chan tak loh avangin BJP chu a chhe ta duai tihna a ni loa, kum 2014-ah pawh BJP sawrkarna chu state 6-ah chauh a nih laiin Lok Sabha MP inthlanah erawh BJP leh a thawhpui party-ten sawrkarna siamin Narendra Modi chu Prime minister atan ruat a ni tih a sawi.
“Kum 9 chhunga BJP leh Pu Modi kaihhruai sawrkarin India ram tan, Mizoram tana a hnathawh hi Mizo mipuiin kan hriatchian lehzualna’n hma kan la dawn. Party dangte angin BJP chuan kan tih theihloh tur kan sawi tur a ni loa, politics hi inbumna tur leh sumdawnna tur a ni lo. Thudik leh ram hmasawnna tur tak thlen theitu party hi Mizo mipui hian an la hmu fiah dawn a, cheng nuai 3 leh nuai 5 sem tih ai chuan PM Schemes atangin dan fel tak hmang leh kan hnathawh dan azirin heng sem an tum aia tam hi kan la hmu dawn zawk a ni,” Vanlalhmuaka hian a ti.