Mobile phone bo himna tur siam

Sawrkar laipui hmalakna zing ami ‘Sanchar Saathi portal’ chu Thawhlehni khan New Delhi ah Communications, Railways leh Electronics & Information Technology minister Ashwini Vaishnaw chuan a hawng.
Sanchar Saathi portal www.sancharsaathi.gov.in hi mipui mamawhna phuhruk turin sawrkar laipuia Department of Telecommunications siam a ni a, mobile phone hmangtuten himna (security) tha zawk an neih theihna tura ruahman a ni. Sanchar Saathi portal kaltlang hian mobile hmangtuten anmahni hminga mobile connection register a ni em, tih an hriat theih bakah an mobile phone an tihbo palhin block emaw chhuizui leh zawn chhuah kawngah leh, kawng tamtakah a pui thei dawn a ni.
Sanchar Saathi portal-ah hian module hrang hrang – CEIR, TAFCOP leh a dangte a awm a. CEIR module hi mobile device/ phone ruk leh tihbo chhuizui theihna a ni. He module hmang vek hian mobile device/phone ruk leh tihbote chu India ramchhunga telecom operator zawng zawngte service hman theih loh turin a block theih a ni. TAFCOP (Telecom Analytics for Fraud Management and Consumer Protection) module hmang hian mobile subscriber ten an number hman lai mek mobile connection chu an mahni hmingin a awm ngei em tih an en theih bakah an mobile connection mamawh tawh loh te an titawp (disconnect) thei dawn a ni.
Sanchar Saathi portal hawnna inkhawmah hian Mizoram atangin Mizoram Police IGP (Intelligence) Veenu Bansal, SP (CID & Crime) Bhisham Singh leh SP (Cyber Crime) Lokeshwaran R bakah NELSA director C Lalhmachhuana, ICT Department senior informatics officer Vanlalringa leh informatics officer Rony Lallianmawia te an tel a ni.