Mobile Phone hmuchhuaktu thlirna

Mobile phone buaithlakna ber chu mipui ten an khawihin an en nasa lutuk a ni, tiin kum 50 kaltaa mobile phone hmuchhuaktu ber chuan a sawi.
Martin Cooper, American engineer chu ‘Father of the Cell phone’ tia hriat lar niin a khawl tereuh te iptea a ah mai theih a siam chhuah chuan theihna nasa tak neiin nikhat chu natna hial pawh a hneh thei ang tih hial a ni.
Mahse, tunah chuan kan atchilh ta lutuk mah mah thung.
“Miin kawtthler a kan dawn chunga a cell phone a bih hian pawi ka lo ti thin a. An chhaw vah a ni,” tiin kum 94-a upa Martin Cooper chuan a sawi a. “A then te chu car in a sut hnuah an harhchhuak ang chu,” tiin a fiamthu zui bawk.
Cooper hian Apple Watch a bun a, top-end iPhone hmangin, a email, photos, YouTube te chu a khawih kual sek a. Mobile phone model thar ber ber hmang zelin mahse apps maktaduai tel awmah, a turu mah mah tawh a ti thung.
“Eng hunah pawh ka tu leh fatena mobile phone an hman thiam leh hriatthiam ang hian ka hmang thiam ngai tawh dawn lo,” tiin a sawi a.
Cooper chuan a iPhone hman mek chu midangte biak nan bera a hman a nih thu sawiin April 3, 1973 a mobil ephone hmasa ber a siam chhuah a hman nen chuan a danglam turu hle thu a sawi a.
Khatih lai khan Motorola-ah a thawh lai niin mobile technology hmasa ber siam chhuah a nih theih nana designer leh engineer fuankhawm zingah a tel a.
Motorola chuan project-ah dollar million tel invest-in Bell System te, khatih hun laia US telecom kum zabi chuang zet kum 1877 atanga awpbet tawhtute chu hneh ngei tuma an beih lai a ni.
Bell’s engineers te chuan World War II tawp rual khan cellular phone system siam chhuahna turin idea an nei tawh a, kum 1960 chho vel khan car-ah hial phone dah dan an lo ngaihtuah diam tawh a.
Mahse, Cooper chuan chu chu mobility tak takah a la ngai thei lo. Kum 1972 kum tawp lam khan khawiah pawh kenkuala hman theih device siam chu a ngaihtuah a ni.
Motorola-a resource awm thei tin te chu hmang vekin semiconductors, transistors, filters leh antennae lama mithiamte chu lakhawmin thla thum zet rim takin an thawk a.
March thla tawp a nih meuh chuan an siam chhuak thei ta a, chu chu DynaTac-Dynamic Adaptive Total Area Coverage – phone an ti.
“He phone hi kilo khat aia rit a ni a, pound hnih leh a zahve vel zet a nih chu, minute 25 inbiak theihna battery a keng tel bawk,” tiin a sawi. “Chu chu harsatna ber a ni lo. Harsatna ber zawk chu a rit lutuk a, mi pangngai tan minute 25 chawi theih chi a ni lo,” tiin a sawi bawk.
Chu phone hmasa ber atanga mi biak vat chu tihmakmawh a ni a. Cooper chuan a elpui ber chu a be hmasa ber ngat a.
“Sixth Avenue (New York) ah dingin, Bell Sytem a ka elpui ber Dr Joel Engel chu ka biak hmasa ber a ngai a ni,” a ti a.
“Joel, Martin Cooper ka nia…handheld cell phone hmangin ka rawn bia che a nih hi. Cell phone dik tak, personal, portable, handheld ngat a ni,” ka ti a.
“A ngawi reng a, a insehruh ngeiin ka hria,” tiin a sawi.
Khang hun laia mobile phone te kha a tlawm hauh lo, pakhat $5,000 vel a ni a, a hmang hmasatu ber ber te chu property seller te an ni daih mai.
“Real estate mi leh sa ten tih thin chu an inhralh tur midang fanpui leh client thar neih nana phone chhan a ni. Tunah chuan a rualin a pahnihin an tikawp thei ta a, an productivity a letin a pung a ni,” a ti a. Mobile phone chuan mihringte nun a tihmasawn takzet zui zel a.
“Tunah chuan cell phone chu mihringa bet tlat tawh niin thil tam tak tih theih a nei a ni. He mi kawngah hian a bul kan tan chauhah ka ngai a. A tih theih te kan hrefiah dawn tan chauh mai,” a ti bawk.
“Nakinah chuan cell phone te hian education a siam danglam ang a, healthcare pawh a siam danglam ang. Kan uar lutuk angin a lang thei a. Mahse, chhuan hnih khat hnuah chuan natna pawh a hneh theih ngei ka ring,” tiin a sawi bawk.
A sana hmangin tui a hleuh laiin a heart rate enfiah reng a ni a, a phone hmangin a hearing aids enfiah reng niin phone te chu nakin lawkah taksa sensor angah hman niin natna neih hmain taksain a hre lawk thei hial ang, tiin Cooper chuan a sawi bawk.
Cooper chuan a tira handset hrawl zet an siam atangin an khawl siam chhuah chuan khawvel a thlak danglam zui an rinsa thu a sawi a. “Nikhat chu mi tin ten cell phone an la neih vek kan ring sa a, chu chu a thleng tep tawh chu a ni. Khawvelah mihring aiin mobile phone subscriber an tam tawh zawk a, kan suangtuahna te a takin a thleng dik ta a ni,” tiin a sawi.
Mipui ten an phone an khawih nasat lutukah pawh technology thar chuan eng pawh ni se ken tel a nei thin a ti a.
“Television a awm tirh khan mi tin te a hip khawm vek. Mahse, engtin tin emaw television ennaah chuan eng emaw quality tak a awm tih kan hrethiam mai,” a ti a.
Tunah pawh phone kan atchilh mek a, mahse, hei hian chatuan a daih dawn lo a ti bawk a. “Generation tin hi an smart zual zel a, cell phone awmze nei leh tha zawka hman dan an zirchhuak leh mai ang a. Mihringte hian kan dap chhuak thei zel,” tiin Martin Cooper chuan a sawi bawk.