Warriors in Pelicans an lehthal

March ni 30, Ningani zing khan NBA regular season khelh chhunzawm a ni a. Champion lai Golden State Warriors chuan an khingpui New Orleans Pelicans an lehthal a, paruknaah an inhlangkai. Inkhel dangah Orlando Magic chuan Memphis Grizzlies chak tluang lai an titawp thei lova, Grizzlies an chak zel.
Western Conference-ah pa sarihnaa awm mek Golden State Warriors hian an hnuai hnuai leh a awm New Orleans Pelicans lakah bul an tan tha lova, quarter hmasa berah point 11 zetin hnufual zawkah an tang nghal. Quarfter hnihnaah Pelicans an khel tha chhunzawm a, champion lai lakah point rukin an sang zui leh a. Point 17 zeta hmahruai chungin chawlhlawk an hmang.
Chak mamawh Warriors hian chawlhlawk an hmang tangkai a, chawlhlawk hnu lamah an khel tha ta viau. Quarter thumnaah tha zetin an khingpuite an hmachhawn a, point an thawkchhuak zawn ta zawt zawt. Quarter thumnaah hian point 13 zetin chungnung zawkah an tang a, Pelicans nen an inkarah point thum chauh a tlak zeh tawh vangin chak theih beiseina an nei sang leh zual a, quarter hnuhnung berah phur zual zawkin an inlan.
Quarter hnuhnung berah hian Warriors an khel tha zui leh viau a, point 35 lai an thawhchhuah laiin an khingpui ten point 20 bak an thawkchhuak thei lo. Point 15 zeta sang fal zui lehin an khingpuite hi point 11 zetin an lehthal a, point belhkhawmah 120-109 a chakin, hnehna pawimawh tak an chang.
Mawi taka an khingpuite lehthaltu Golden State Warriors hi paruknaah an inhlangkai a, direct-a playoff khel phak thei dinhmunah an inhlangkai. Wertern leh Eastern conferene-ah a sang paruk ten direct in playoff an khel phak dawn a. Pasarihna atanga 10-na thleng ten play-off khel tur zawnna ‘play-in’ an hmachhawn zui leh ang. Golden State Warriors hian hma lam pan tumin tan an khawh zui dawn a, direct a play-off khelh phak an tum ang. Warriors lakah uiawm taka tlawm Pelicans hi pakuanaah an awm chhunzawm a, play’in khelh phak tumin tan an khawh zui ve bawk ang.
New Orlean Pelicans an lehthal tum hian Warriors player pawimawh Stephen Curry chuan point 39 a thawkchhuak a, team tan a tangkai hle. Point 39 a thawhchhuah zinga point 21 zetin hi three points atanga a thawhchhuah an ni nghe nghe. Pelicans tana point thawkchhuak hnem ber Brandon Ingram chuan point 26 thawkchhuak mah se, an team tlawm tur a chhanhim zo chuang lo thung.
Ningani zinga inkhel dangah Western Conference-ah pahnihnaa awm mek Memphis Grizzlies chuan Orlando Magic an hmachhawn a. Magic lakah point 113-108 a chakin an chak a. Griezzlies hi an khelh hnuhnung pasarihah an chak zawn ta chiah a, pahnihna dinhmun an luah nghet.
Orlando Magic an hneh theih nan Griezzlies tan Desmond Bane chuan point 31 a thawkchhuak a, a khel tha hle. Griezzlies hi play-off phak ngei tura ngaih ngheh an ni tawh a. NBA champion nih tumin tan an khawh zui ang.
Ningani zinga inkhel dangah Eastern Conference-ah pahnihnaa awm mek Boston Celtics chuan Washington Wizards an hmachhawn a. Eastern Conference-a hma-hruaitu Milwaukee Bucks lehpelh theihna hun tha an neih an chhhawr tangkai zo lova, Wazards lakah uiawm takin tlawm zawkah an tang.
Wazards lakah an tlawm vanga Conference hmahruaitu nih theihna hun tha chhawr tangkai zo lo Celtics hian inkhel hautak an hmachhawn zui leh a ngai dawn a. An inlan leh hmasak berah Eastern Conference hmahruaitu Bucks nen an inkhel ang