Nimin khan state level ‘Mock Exercise on Earthquake’ chu district headquarters tinah neih a ni a, hrileng avanga kum thum zet mock drill kan neih theih tawh loh hnuah kum thar tir lamah hetianga ruahmanna fel tak hmanga mock drill neih leh theih a ni hi a lawmawm hle. Ram changkang zawkte chuan thla thum danah mock drill hi an kalpui thin a, keini ram hnufual zawkte tan chuan a la harsa rih niin a lang.
-- Advertisement --
Tun tuma mock drill neihnaah hian lirnghing hi a na viau mai a, richter scale 8.7 a ni a. Khawvel huapa lirnghing nâ, mihring thih tamna top ten zingah kum 2004-a Sumatra, Indonesia kha pasarihna niin richter scale 9.1 a ni a, mihring nuai 2.27 an thi a. Lirnghing avanga tsunami lo awm khan ram 14 zet a khawih a, India pawh kan tel ve a nih kha. Kum 2010-a Haiti-a richter scale 7-a nâ lirnghing kha mihring thihpui tamna ber dawttu a ni a, mihring nuai thum chuang an thi a. Richter scale a san vak loh pawhin lirnghing thawhna hmun azirin chhiatna thlen dan hi a nasa thei hle.
Tun tum lirnghing rawn intanna bu pui ber epicentre hi Champhai a ni a, a ‘shock’ a na viau ang tih a rinawm a. Lirnghing na tak a lo thlena kan tawrh tur lian tak tak pathum chu heng —electricity, inkalpawhna leh inbiakpawhna te hi a ni a. Power supply a awm loh pawha rescue team ten emergency-a an hman tur hi engtiang chiahin nge kan lo inralrin? Electricity power a awm loh chuan inbiakpawhna a lo tawp a, inkalpawhna kawngpui a lo chhia a, electric ban leh thingkung etc. tlu avangin kawng a lo ping bawk a, chutiang huna chet lak dan turah chuan eng chen nge hmanrua lamah hian kan lo inralrin tih hi thil pawimawh tak a ni awm e.
Mock Drill hi chu hmun hnih khata buatsaih, a tak ram ni lo, tih dan tur ruahman sa hmanga tluang taka neih mai theih a ni a. Chhiatna a lo thlen tak tak huna kawlphetha, inkalpawhna leh inbiakpawhna hmun tinah a chhiat thulha chet lak dan tur lamah hian, khawtlang leh pawl hrang hrangte nena thawhho dan tur lo ruahman lawk sa pawh hi a pawimawh a rinawm.