Modi-a leh Xi-a ten sumdawnna leh inpawhna tha zawk siam tiam

Kum 2020-a Himalaya tlangdunga an inrinaa intibuai ram pahnih, Indian leh Chinese hruaitute chuan sumdawnna leh inpawhna tha zawk siam an tiam niin New Delhi-in a puang.
New Delhi-a Inrinni leh Pathiannia BRICS Summit neih zawh takah Inrinni khan Indian Prime Minister Narendra Modi-a leh Chinese President Xi Jinping-a te chu an inkawm a. Tun hi Xi-a’n kum sarih hnua India a tlawh lehna hmasa ber a ni.
Sipaia an inepna boruak chu a dai tawh a, ram pahnihte hian sumdawnnaa an inpawhna chu chak taka kalpui leh tha an ti a. Heng zingah hian red tape, visa tihkhawtlai leh industry hmanruaa khuahkhirhna kalpuite thlahdul an rem ti a ni.
Indian foreign ministry-in an inkawm zawha thuchhuah a siamah, “Hruaitu pahnihte hian … cultural exchange, sumdawnnaa inzawmna siam leh ram pahnihte kawng hrang hranga inpawhna siamna tihchak an rem ti,” tiin a tar lang.
“Eibar leh sumdawnna inkungkaihna chungchangah ram pahnihten an mamawh leh duh ang inngaihchansak tha an ti a, heng zingah hian sumdawnna inkhairual lo awm siam rem te, mamawh inpeknaah harsatna awm tihfel te, awmze nei leh chhut lawk theih tura inzawrhna kalpui dan dap te pawh a tel,” an ti.
Chinese customs-in an chhinchhiah dan chuan India leh China inkara sumdawnnaa sum che hi kum 2025 khan $ tluklehdingawn 155.6 a tling.
China hi India-in thil a lak luhna ram lian ber a ni tawh a, Indian-ten China atanga thil an lei hi 2025-26 chhungin $ tluklehdingawn 132 man zel a tling a. India-in China-a a thawn ve erawh hemi atanga chhut chuan a tlem hle a, New Delhi thawn chhuahin a lak luh a phak lohna hi $ tluklehdingawn 100 chuang a ni.
Xi-a chuan China hian an inkungkaihna chu pawimawh leh hun rei tak daih tura siama tihchangtlun zel a duh reng tih a sawi niin an sorkar news agency, Xinhua chuan a tar lang.
Ram pahnih inkara thil tihte chu zawi zawiin a ziaawm leh hret hret a, thawhhona huang pawh zauh zel niin insumdawn tawnna pawhin a san lai a tawng thar tih a sawi bawk.
China ​leh India hi kum 1962 khan rei lo te nasa takin an lo indo tawh a. Kum 2020-a intibuaia Indian sipai 20 leh Chinese sipai pali thihna a thlen hnuah an inep leh nasa hle bawk.
Kum 2024 khan Xi-a leh Modi-a hian Himalaya khawthlang lam ramria sipai dah belha an inepna boruak chu tihdaih an rem ti dun zui a. Hemi hnuah hian zawi zawia inpawh leh hret hretin ramri-ah pawh an sipaite an inbe zui zel a ni.
Indian sorkarin thu a chhuahah chuan Modi-a hian ramri a muan chu ram pahnihte inkungkaihna atana mamawh a ni tih a sawi tih tar lan a ni.
Nuclear ralthuam nei ram pahnihte hi km 3,800-a thui an inri a, hmun tam tak hi tlang sang, khawkrawk, dil leh rem lo tak taka kal niin chiang lo tam tak a awm a ni.