Modi-a’n China hmain Japan tlawh dawn

Modi-a’n China hmain Japan tlawh dawn
Prime Minister Narendra Modi-a chuan August 29 leh September 1 chhung hian Japan leh China a tlawh dawn niin Ministry of External Affairs (MEA) chuan a sawi.
Japan Prime Minister Shigeru Ishiba-a’n Modi hi August 29-30 chhunga 15th India-Japan Annual Summit-a tel turin a sawm a. A tlawh vawi riatna tur niin Ishiba nena an inkawmna hmasa ber tur a ni dawn thung tih MEA chuan a puang.
Hruaitu pahnihte hian India leh Japan inkara Special Strategic & Global Partnership an tih, ram venhimna leh himna, sumdawnna leh ei leh bar, technology leh thil thar chinna leh mipui inpawh tawnna tura hmalakna leh hmachhawp te, tih zel turte an sawi dun dawn a ni.
An chhehvel leh khawvel pum muanna a awm theihna tura an ngaihdante pawh an sawi dun dawn a. Modi-a’n a tlawh tur hian ram pahnih inthian thatna awm sa mek a tihnghet lehzual tur thu MEA chuan a sawi.
Tar lan tawh thin angin Modi-a hian China a tlawh dawn bawk a, President Xi Jinping-a nen an inkawm dawn a. China hi August 31 leh September 1 inkara Tianjin-a Shanghai Cooperation Organisation (SCO) Summit-a tel tura tlawh tur a ni a. Summit piah lamah hian a tel ram hruaitu dangte pawh prime minister hian a kawm dawn a ni.
India hi kum 2017 atang khan SCO member niin kum 2022-23 chhung khan an pawla Council of Heads of State-ah president nihna pawh a lo chelh tawh.
India leh China inkar tha zel karah kar liam ta khan Chinese Foreign Minister Wang Yi-a chuan Prime Minister Modi-a hmuin President Xi-a’n SCO Summit-a tel tura a sawmna pawh a hlan nghe nghe.
Chinese Foreign Minister Wang-a hian India hi August 18-19 chhung khan a tlawh a ni.
Prime Minister Modi-a pisa chuan “Pu Wang Yi-a hian President Xi-a hnen atangin prime minister hnena thu a chah leh Tianjin-a SCO Summit-a tel tura sawmna a hlan a. External Affairs Minister Dr. S. Jaishankar leh 24th Meeting of the Special Representatives-a an inbiakna, NSA Ajit Doval-a nena an kaihhruai duna an thil sawite pawh a hrilh a ni,” tiin a tar lang.
Prime minister hian India-China ramria muanna leh thil fel a duh tih sawiin India hian dik, chhan tha leh lehlam lehlamin an pawm tlan leh hlawkpui theih tur inremna a awm theih nana hmalak zel tha a tih tih a lo sawi tawh.
Modi-a hian President Xi-a’n SCO Summit-a tel tura a sawmnaah lawm thu sawiin a tel tur thu pawh a sawi chiang bawk.
China-in SCO president nihna a chelh leh President Xi-a nena Tianjin-a an inbiak tur pawh a nghahhlelh thu a sawi a. India leh China inkar chu nghet, sawi lawk theih leh a tha zawnga kal zel a duh a, an chhehvel leh khawvel pum tan an inkawmngeih chu a tha tih a sawi bawk.