Sorkar policy te chu Adani group te tan bik liau liaua siam tia sawiin Congress chief hlui Rahul Gandhi chuan Prime Minister Narendra Modi chu business tycoon Gautam Adani nena ‘an inlaichinna’ sawifiah turin a ngen.
Lok Sabha-a President’s Address-a Motion of Thanks a telin Opposition bench atanga thusawi hmasa ber niin Gandhi chuan Modi an kum 2014-a Prime Minister a nih atangin ‘magic’ a thleng tia sawiin, Adani hausakna chu khawvl billionaire list a 609 na atangin pahnihnaah a kai chho zawt tiin a sawi bawk.
-- Advertisement --
Lok Sabha Speaker Om Birla chuan Congress chief hlui chu thlalak pahnih, pakhata Modi leh Adani thlawhna chhunga an thu dun lai leh, pakhat chu Modi Adani logo chuang thlawhna atanga a chhuk lai chu pholang zui lo turin a ti bawk.
Foreign policy hlawkpui
Gandhi chuan Modi chu Adani group te duhsak bik tia sawiin tun hnai kum 20 chhungin electoral bond hmangin ports-to-power conglomerate Adani Group te atangin BJP te hian sum engzah nge an hmuh tiin zawhna a zawt a.
Adani Group tena ram hrang hrang Israel, Bangladesh leh Sri Lanka leh ram dangah te sumdawnna huang an zauh dan sawiin Congress leader chuan ‘India foreign policy hi Adani foreign policy a ni’ tiin a sawi.
Rahul Gandhi chuan Harvard Business School te ang zirna in tha chuan Adani chu ‘mimal sumdawnna tihchak nan engtiangin nge sorkar thiltihtheihna kan hman ang’ tih case study nei se a ti bawk a.
“Prime Minister, tum engzah nge i zinnaah Adani hian a zui che? I ram tlawh zawh chiahah tum engzah nge Adani hi a zin zui nghal thin? Ram dang i tlawh zawh chiah hnuah Adani-an foreign ramah tum engzah nge contract a hmuh?” tiin Kerala-a Wayand constituency Lok Sabha MP chuan zawhna a siam bawk a.
Post-2014 ‘magic’
Wayanand MP chuan Adani leh Modi inlaichinna chu Modi a Gujarat Chief Minister a nih atanga intan a ni a ti bawk a. Khatih lai khan ram chhung hmun tinah Modi laka zawhna siam a nih laiin Adani chuan thlawp tlatin rinawm takin khatih laia Gujarat CM-in Gujarat siam that a kalpui kha a thlawp a ni, tiin Gandhi chuan a sawi bawk a.
“Magic dik tak chu PM-in Delhi a thutchilh hnu kum 2014 khan magic tak tak a intan a ni. Kum 2014 khan Adani chu khawvel mihausa tehnaah 609-na a ni a, chuta tang chuan pahnihnaah a kai chho thei hial a ni,” tiin a sawi.
Gandhi chuan Bharat Jodo Yatra a neihnaah pawh mi tam tak ten engtiangin nge Adani hausak chu kum 2014-a $ 8 billion atanga kum 2014 a $ 140 billion-ah a kai chhoh theih an ti a ni, tiin a sawi bawk.
Adani-an mipui sum a hui
“Yatra ka neihnaah miten eng vangin nge Life Insurance Corporation of India sum te Adani group ah invest a nih tiin min zawt a. Hei bakah hian eng vangin nge Adani share te tlahniam thut thuta LIC fund te dah a nih an ti bawk a. Sorkar leh PM ten Adani-an crores sang tel tehmeuh mipui sum public sector bank ami Adani hnenah an pe tia sawi ka duh a ni,” tiin a sawi bawk.
Congress leader chuan Modi sorkar chuan Adani group te hnena airport paruk enkawlna an pek theih nan dan an siam danglam a ti bawk a. “Mumbai airport pawh GVK group hnen atangin Central Bureau of Investigation, Enforcement Directorate te hmanga chhuhsak niin Govenrment of India chuan Adani te hnenah a pe a ni,” tiin Gandhi chuan a sawi bawk.
Defence deal-ah zawhna nei
Congress leader chuan sorkar chu shell company lem te chhui chiang tura ngenin Adani group te chuan sector pawimawh an khawih avangin national security atana pawi thei a awm a ti a.
“Adani te hian drone an la siam ngai miah lo va, Hindustan Aeronautics Limited (HAL) te leh company dang te chuan an siam thung. PM Israel-ah a zin a, Adani ten contract an hmu daih a. Defence firm pali lai he lam hna la thawk ngai lo an nei a. Adani farm te chu small arms, sniper rifles te siam chauh an ni,” tiin a sawi bawk.
Adani Group te hian airport business-ah 40% market share an nei a, Israel-India defence cooperation-ah 90% an thunun a ni, tiin Gandhi chuan a sawi bawk.
Congress leader chuan PM chu thawhtannia HAL-a event neihnaa Opposition te chu Rafale deal a dik lo tak tia puha dawt sawiah a puh thu a sawi bawk a. “Niminah Prime Minister in HAL ah dik lo takin kan puh thu a sawi a. Mahse, a nihna dik tak zawk chu HAL contract hmanga aircraft 126 siamna tur chu Anil Ambani hnenah pek a ni a, amah hi a tlachhe zui,” tiin a sawi bawk.
Congress leader chuan Agniveer scheme sawisel bawkin Rashtriya Swayamsevak Sangh leh Home Ministry te barh luih a ti bawk a. “Senior officer te chuan armed forces a ti chak lo zawk dawn tih min hrilh a ni,” tiin a sawi bawk.