Modi thusawi Congress ten chhang

Congress tena Lok Sabha manifesto a hausakna leh sum lakluh intluktlang lo lutuk siam that an intiamna chu sawinepsakin Prime Minister Narendra Modi chuan Centre-a Congress te thlan tlin an nih chuan mipui thil neih, ram leh gold te chu Muslim te hnenah an sem darh ang a ti a. “Congress te chuan Muslims te chu he ram resources a rights nei hmasa ber an lo ti sa tawh a ni” tiin Modi chuan a sawi.
Rajasthan-a Jalore leh Banswara constituency candidate te a campaign puinaah Modi chuan Congress te chuan mimal thilneih te, hmeichia tena lunghlu an neih te, tribal chhungkua tena silver an neih te, sorkar hnathawk leh midang tena ram leh sum fai an neih te chu survey an nei ang a, chu mi hnuah an semdarh ang a ti a. “Rim taka in thawh chhuahsa sorkarin laksak che u se la in lawm dawn em ni” tiin zawhna a siam bawk.
Congress tena manifesto an tihchhuah hnuah India rama hausakna leh sum lakluh inthlau lutuk chu siam that an tum an ti a. Party leader Rahul Gandhi chuan tun thla tir lama Hyderabad a thusawina a neihah Congress te chu thlan tlin an nih chuan financial leh institutional survey chu caste census tihfel hnuah neiin chuta tang chuan ram mipui tena hausakna kan insemzai theihna tura hmalak a ni ang a ti a ni.
Modi chuan kum 2006 khan Congress Prime Minister Manmohan Singh chuan Muslim-te chuan India resources te an nei hmasa ber thei a ti tawh a ti bawk a. “Chu mi awmzia chu property te chu fa nei tam ber ber te hnenah sem darh a ni ang a, India rama lut ru te hnenah sem darh a ni dawn tihna a ni a. Chu chu in pawm thei em ni?” a ti bawk.
Prime Minister chuan Congress te ‘urban Naxal’ ideology chuan hmeichhia te pawh a zah lo a ti bawk a. “Kan nu leh unaunu te Gold jewellery te hi show atan chauh a ni lo va, self-respect thil a ni. Congress te hi an va tlahniam em em ve, in sum thawhchhuah harsa tak chu ram chhunga lut rute kutah a lut ang maw?” tiin Modi chuan a sawi bawk.
Congress ten chhanglet
Congress-te chuan Prime Minister Narendra Modi chu Muslim community te hnenah hausakna an sem darh ang tih inziahna an manifesto a paragraph khat pawh a awm chuan pholang turin an tur nghal thung.
Congress president Mallikarjun Kharge chuan Prime Minister chuan Lok Sabha inthlan thawhkhatnaah INDIA bloc te an che tha tih a hriat hnuah ‘hate speech’ a kalpui nghal a ti.
Kharge chuan thuneihna duha dawt sawi leh elpui te behchhan awm lova beih vak vak hi Modi a lakluh bur Rashtriya Swayamsevak Sangh-Bharatiya Janata Party combine te values a ni a ti.
“India history-ah Modi ang em ema Prime Minister dinhmun tihniam hi an la awm lo” tiin Congress chief chuan a sawi bawk a.
“Inthlana chak duhna avangin Hindu-Muslim hmingin dawt i thehdarh a ni. Prime Minister hi kan manifesto-ah Muslim emaw Hindu tih thumal a awm emaw pholang turin ka cho a ni. Ka chona chu i pawm lo a nih chuan dawt sawi bansan rawh” tiin Congress leader Pawan Khera chuan Prime Minister Modi chu choin a sawi bawk.