MZP-in zangnadawmna phut

Mizo Zirlai Pawl chuan April 21 tlai dar 5.00 vela Durtlang North-a an zirlai pui Lalawmpuia (12), Border Security Force (BSF) lirtheiin a chil hnu lawka a boral chu pawi a tih thu a sawi a. He thil thlenga mawhphurtu chu a phu tawk hremna pe tur leh vanduaina tawkte chhungkua zangnadawmna pe turin a phut tih a sawi.
MZP Gen. Hqrs. chuan Govt. Durtlang Middle School-II a pawl 6 zirlai Lalawmpuia thihna chu pawi a tiin, a kalsan tak a chhungte a tuarpui a. He vanduaina thlentu BSF motor-in an zirlaipui a chil hnuah, buaipui zui loa a tlanchhia chu a hrethiam lo hle tih a sawi.
Mizorama security force awmten an awmna hmun azira insiamrem a, Mizo mipui zah turin MZP chuan a ngen tih a sawi a. Tuna vanduaina thleng pawh a tuartute zangnadawmna tha tawk tak pe turin BSF hotute a ngen tih a sawi a ni.