Morgan Wallen ‘Last Night’ a la Hot ber

Morgan Wallen ‘Last Night’ a la Hot ber
Morgan Wallen hla hit ‘Last Night’ chu Billboard Hot 100 (singles) chart-ah a No.1 a, he chart-a kar sarih a No.1-na a ni ta a, hetihrual hian Lil Durk ‘All My Life’ featuring J. Cole pawh No.2-ah a debut a, Luke Combs pawh top 10-ah a inhlangkai thar ve leh ta bawk.
Billboard Hot 100 (singles) chart hi kar khat chhunga US-a hla lar dan tehna a ni a, chart ranking siam nan all-genre US streaming (official audio leh official video), radio airplay leh sales data te chu tehna pawimawh a ni.
Morgan Wallen ‘Last Night’ hian kar khat chhungin radio airplay-ah ngaithlatu maktaduai 63.3 a la nei thei a, stream, maktaduai 33 leh download sales 9,000 nen, hei hi chart-ah a No.1 pui leh ta a ni.
He hla hi March thla khan a vawi khat nan a No.1 a, Morgan Wallen tan Hot 100 chart-a No.1 kai thei hla a neih hmasak ber a ni a, he hla awmna album ‘One Thing at a Time’ pawh Billboard 200 (albums) chart-ah kar 11 chhung a No.1 tawh bawk a ni.
Lil Durk ‘All My Life’ featuring J.Cole chu stream maktaduai 30.9 leh download sales 3,000 a tling a, radio airplay-ah pawh ngaithlatu maktaduai 10.8 neiin, chart No.2-ah a debut a, Lil Durk leh J.Cole tan he chart-a an tawn san ber a la ni ve ve a, Lil Durk tan chart top 10-a a lang thei hla pathum a neihna niin, lead role ang chuan a pakhatna a ni thung. J. Cole tan chuan top 10-a lang thei hla 11 a neihna a ni ve thung.
Chart No.1 hlui Miley Cyrus ‘Flowers’ chuan radio airplay-ah ngaithlatu maktaduai 91.2 la nei theiin, chart No.3 a la ni a, Radio Songs chart-ah phei chuan he hla hi kar 14 chhung a No.1 tawh a, he chart-a hla No.1 ni rei theihah pasarihna a ni pha tawh hial a ni.
Hot 100 chart No.1 hlui bawk SZA ‘Kill Bill’ chu No.2 atangin No.4-ah a tawlh a, Eslabon Armado leh Peso Pluma ‘Ella Baila Sola’ chu No.4 atangin No.5-ah a tawlh ve ta bawk.
Rema leh Selena Gomez ‘Calm Down’ chu No.5 atangin No.6-ah a tawlh a, Metro Boomin, The Weeknd leh 21 Savage “Creepin'” chu No.6 atangin No.7-ah a tawlhin, Toosii ‘Favorite Song’ chu No.8-ah bawk a la awm.
Luke Combs-a’n Tracy Chapman hla ‘Fast Car’ a cover chu stream maktaduai 19.5 leh download sales 8,000 tlingin, radio airplay-ah pawh ngaithlatu makatduai 13 neiin, No.11 atangin No.9-ah a invawrh a, Combs tan he chart top 10-a lang thei hla pathum a neihna a ni.
‘Fast Car’ hi Tracy Chapman phuah niin, August 1988 khan Hot 100 chart-ah No.6 a lo kai tawh a, he hla avang hian 1989-ah Tracy Chapman hian Grammy Awards-ah best female pop vocal performance a dawng nghe nghe a ni.
Chart top 10 khartu chu chart No.1 hlui Taylor Swift ‘Anti-Hero’ a ni a, he hla hi kar riat chhung a No.1 thei a, chart top 10-ah pawh kar 28 chhung a lang tawh a, Swift tan a hla he chart-a No.1 ni rei thei ber leh chart top 10-a lang rei thei ber a la ni a.