Morgan Wallen ‘One Thing at a Time’ a la No.1

Morgan Wallen ‘One Thing at a Time’ a la No.1
Morgan Wallen album ‘One Thing at a Time’ chu Billboard 200 (albums) chart-ah a No.1 a, he chart-ah kar 11 a No.1-na a ni ta a, a album hmasa ber ‘Dangerous: The Double Album’ aiin kar khatin a No.1 rei ta zawk a ni. Hetihrual hian Jonas Brothers, YoungBoy Never Broke Again leh Bailey Zimmerman te pawh top 10-ah an debut a, Daft Punk No.1 album hlui ‘Random Access Memories’ chu top 10-ah a rawn lang thar ve leh ta bawk.
Billboard 200 hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralh zat bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
One Thing at a Time hi 1,34,500 hralh lehin, chung zinga 1,24,500 chu streaming atanga album tlukpui (on-demand official stream maktaduai 165.47) niin, album tak tak hralh zat chu 8,000 a ni a, album-a hla mal hralhna atangin 2,000 a tling thei bawk.
One Thing at a Time hi a zawnin kar 11 a No.1 tling ta, 1998-a Titanic soundtrack kar 16 a No.1 hnuah he chart-a a zawna kar 11 chin No.1 leh thei hmasa ber a ni a, soundtrack ni loah chuan 1987-a kar 11 No.1 thei Whitney Houston album ‘Whitney’ hnua kar 11 a zawna No.1 leh thei ber a ni bawk.
Chart No.1 hlui Taylor Swift ‘Mignights’ chu 60,000 hralh lehin No.3 atangin No.2 a kai thar ve leh ta bawk.
Jonas Brothers pawhin thawm an nei thar ve leh a, a album thar ‘The Album’ chu 52,000 hralhin No.3-ah a debut a, he chart-a an album top 10 kai thei pasarihna a ni.
Rapper YoungBoy Never Broke Again album thar ‘Richest Opp’ pawh 51,000 aia tam deuh hralhin No.4-ah a debut a, he chart-a top 10 kai thei album 15 a neihna a ni a, heng a top 10 album te hi 2018 hnua mi vek an ni nghe nghe a, tihian rapper zinga he chart top 10-a lang thei album ngah lamah Drake leh Future nihrualin, pahnihna a ni a, top 10 album 16 nei thei Jay-Z leh Nas chiah a pha lo.
Chart No.1 hlui SZA ‘SOS’ chu 51,000 hralhin No.4 atangin No.5-ah a tawlh a, Morgan Wallen ‘Dangerous: The Double Album’ chu 48,000 hralh lehin No.5 atangin No.6-ah a tawlh ta bawk.
Bailey Zimmerman album thar ‘Religiously. The Album’ chu 46,500 hralhin No.7-ah a debut a, he chart top 10-a lang thei album pahnihna a neihna a ni.
Chart No.1 hlui, Daft Punk album hlui ‘Random Access Memories’ chu 40,000 hralh lehin No.8 a kai thar leh a, he album hi June 2013 khan kar hnih chhung chart-ah a lo No.1 tawh a, tunah hian a album kum 10 tlin champha pualin a deluxe edition an tlangzarh thar leh a, chu chuan album hralh a tikal leh ta a ni.
Chart top 10 khartu chu Ed Sheeran ‘-‘ (Subtract) leh Taylor Swift ‘Lover’ te an ni a, ‘-‘ hi 40,000 hralh lehin No.2 atangin No.9-ah a tawlh nghal a, chart No.1 hlui ‘Lover’ hi 38,000 hralh lehin No.7 atangin No.10-ah a tawlh ta bawk.