Morgan Wallen ‘One Thing at a Time’ a No.1 leh ta

Morgan Wallen ‘One Thing at a Time’ a No.1 leh ta
Morgan Wallen album ‘One Thing at a Time’ chu Billboard 200 (albums) chart-ah a No.2 atangin No.1 a kai leh ta a, he chart-a a No.1 tawh zawng zawng belhkhawm chu kar 13 a tling ta a, tihian Republic Records hnuia album tlangzarh zinga chart No.1 ni rei thei ber a rawn nih rual ta chiah a ni. Hetihrual hian Niall Horan album thar ‘The Show’ pawh No.2-ah a debuta, Noah Kahan ‘Stick Season’ chu top 10 a kai ve ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nen hian album tak tak hralhna bakah, streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Morgan Wallen ‘One Thing at a Time’ hi kar khat chhungin US-ah 1,11,500 an hralh leh a, chung zinga 1,05,000 chu streanming atanga album tlukpui (on-demand official stream maktaduai 140.74) niin, album tak tak hralh zat chu 4,500 a ni a, album-a hla mal hralhna atangin 2,000 a tling thei bawk.
‘One Thing at a Time’ hi March thla chawhma lama tlangzarh kha niin, kar 12 chhung a zawnin a No.1 a, chutah kar hnih chhung No.2-ah awmin, tunah a rawn No.1 leh ta a ni.
Niall Horan album thar ‘The Show’ chu 80,500 hralhin No.2-ah a debut a, chung zingah 68,000 chu album tak tak hralhna niin, streaming atangin 12,000 (on-demand official stream maktaduai 15.42) niin, album-a hla mal hralhna atangin 500 a tling thei bawk. Niall Horan hian a solo album pathum te chu chart top 5-ah a la debut pui vek a, a album hmasa Heartbreak Westher chu 2020 khan No.4 niin, Flicker chu 2017 khan a No.1 pui tawh bawk.
Noah Kahan ‘Stick Season’ chu 71,000 hralh lehin No.100 atangin No.3-ah a invawrh a, he album hi October 2022-a a tlangzarh tawh kha niin, June ni 9-ah a deluxe reissue leh vinyl a tichhuak thar leh a, hei hian album hralh a tikal thar leh ta a ni. Album tak tak a hralh zat chun 22,500 niin, streaming atangin 48,000 (on-demand official stream maktaduai 60.91) a tling a, album-a hla mal hralhna atangin 500 a tling thei bawk. Stick Season hi Kahan studio album pathumna a ni.
Chart No.1 hlui, Taylor Swift ‘Midnights’ chu 69,000 hralh lehin No.5 atangin No.4-ah a insawn thar leh a, Metro Boomin ‘Spider-Man: Across the Spider-Verse’ soundtrack chu 54,000 hralh lehin No.7 atangin No.5-ah a insawn a, kar kalta No.1 Stray Kids ‘5-STAR’ chu 53,000 hralh lehin No.1 atangin No.6-ah a tawlh a, Lil Durk ‘Almost Healed’ chu 50,000 hralh lehin No.6 atangin No.7-ah a tawlh ta bawk.
Chart No.1 hluiSZA ‘SOS’ chu 49,000 hralh lehin No.9 atangin No.8-ah a kai thar leh a, chart No.1 hlui bawk Morgan Wallen ‘Dangerous: The Double Album’ chu 45,000 hralh lehin No.11 atangin No.9 a kai thar leh a, chart No.1 hlui bawk Taylor Swift ‘Lover’ chu 37,000 hralh lehin No.12 atangin No.10 a kai thar ve leh ta bawk.