MotoGP: Austin hnehtu Alex Rins
Pole atanga bul tan MotoGP defending cham-pion Francesco Bagnaia chetsual hlawkpuiin LCR Honda rider Alex Rins chuan Pathianni Grand Prix of the Americas-ah lawmman semna dawhsan sang ber a luah nawlh a, season kal laia MotoGP hnehna a chan vawikhatna niin, a career-a a chak vawirukna a ni nghal.
Spaniard rider Rins hian season liamta khan a team kalsan tak Suzuki behchhanin Grand Prix hnehna tum hnih a chang a; Pathianni Austin tlan-kawngah hma a hruai laia Italian Bagnaia chetsual hnuin intlansiak a thunun nghet hmiah a, kum 2018 daih tawha Britain rider Cal Crutchlow-a’n Argentina rama hnehna a chan hnua LCR Honda-in MotoGP hnehna an sualchhuah leh vawikhatna a ni.
Texas intlansiakah hian season bultanna Portugal-a chak Italian Bagnaia chu lap 20 tlan tura lap riatna turn two-ah a chesual a, rin kai lo Rins a dinchan phah lel!
Ducati-VR46 rider Italian Luca Marini chu second 3.498-a hnufualin pahnihnaah a thleng a; Yamaha khalhtu France 2021 world champion Fabio Quartararo chuan lawmman semna dawhsan hniam ber a luah ve thung.
Thleng hmasa ber Rins chuan hnehna a chan hnuah race boruak sawichhuakin, “Ka tum chu ‘Percco’ (Bagnaia) nawr kha a ni a, he finhmun ka luah ta mai hi ka hlim takzet a, he team hi ka chhuang a ni,” a ti.
Thla hmasa Argentina rama hnehtu Ducati-VR46 rider Marco Bezzecchi chuan parukna luahin, podium lawn pha lo mah se Texas lama a point hmuh belh leh hmangin championship-a a hmahruaina a sawhnghet a, amah hnaihbertu Bagnaia lakah point 11-in a sang. Ducati rider Bagnaia hi Bezzecchi a umna lamah Argentina ramah khan a lo chesual tawh bawk a ni.
Inrinni khan Austin tlankawnga sprint race-ah Bagnaia chakin, Pathianni race pui-tlingah pawh rinkai ber a ni leh a, a chetsual leh tak hnuah a hun tawn a hriatthiam loh thu sawiin, a hlim lo takzet tih a sawi.
MotoGP: Austin hnehtu Alex Rins
Get real time updates directly on you device, subscribe now.
Prev Post
Next Post