Motor luh lohna khuaah kein
Tunlaiin Mizoram khaw thenkhatah H1N1 hmuh a ni a, khaw thenkhatah H1N1 vang ni chuang lovin an khua a sikin an dam lo bawk. Chutiang karah chuan khawthlang lama khaw pakhat, motor luh lohna khuaah an dam lo sup sup a, health department-a thawkte’n ke-a kalin he khua hi an kal chilh.
He khua hi Mamit District-a Khanthuam khua a ni a, in 50 vel khua niin, mi 250 vel an cheng. Tun hnaiah an dam lo sup sup a, District thuneitute beng a lo thleng a, motor luh lohna khua hi kein an kal chilh ta a ni.
Mamit CMO-in an chanchin a lo hriatin a hmuna kala endik ngei tul an ti a, mi paruk an thawk chhuak a ni.
October ni 9-ah Mamit an chhuahsan a, West Phaileng-a Salem Boarding peng thleng motor-in an kal. Motor an dah a, Teirei, Khawhnai, Tuirum te an paltlang hnuah Kawrnului an thleng a, Kawrnului atang pawh hian Khanthuam thleng turin darkar hnih a la ngai.
Bag an ak a, a khat tawk damdawi an ak. Thawmhnaw hakthlak an keng lo. Tuirumah Khanthuam atangin mi paliin an lo hmuak a ni.
Tlai dar 4.30 velah an thleng a, a zanah missionary inah dam lo an en nghal. Zan dar 10.30 an thleng a, a tuk zingah dam lo hi an en leh bawk.
Dam lo hi mi 164 an en a, sample pasarih lain Mamit-ah hei hi an hawn. Sample hi endik a ni a, result a la hriat loh tih thu dawn a ni.
Thu dawn danin, an nat dan a inang deuh thum a, khawsik, hritlang, khuh hnawk a ni tlangpui.
A tukah an team hi Mamit panin an kir a, Kawrnului an kal thlenin tractor hman tur a lo awm hlauh. An motor dahna thlengin tractor hian an haw a ni.
An kalna kawng hi hmun thenkhat chu kawng mumal lo a ni a, ruah sur lai a nih avangin a diak bawk. Vanneihthlak takin Kawrnului a lo lian lo hlauh.
Khanthuam hi Tuikuk khua a ni a, khawlaiah ran a la tla tih thu dawn a ni. An khuaah medical team an kal dawn tih an hriatin sabon te an chah a, damdawi kenga ke-a kalte hian sabon te an kensan a, ‘Engatinge purun min rawn kensak loh?’ tiin medical team hi an lo dawngsawng bawk!
“A tul a, kan kal a ni mai a. CMO-in kal a ngai a ti a, kal hi a ngai reng bawk a. Thu awihin kan kal a ni mai,” tiin he medical team-a an hotunu Dr Lalrempuii chuan a sawi. Ani hi Mamit-a health & wellness centre-a medical officer a ni.