MP-in Myanmar ram lut

MP-in Myanmar ram lut
Rajya Sabha MP K Vanlalvena chuan Myanmar-a Chinland Council sawrkar thuthmun, Chin State ami Camp Victoria chu February 27 khan a tlawh a. February 28 khan Zokhawthar ral lehlama awm Khawmawi tlawh lehin, Hualngoram sawrkar (HPO) hruaitute nen an inkawm.
Camp Victoria a tlawhnaah hian Chinland Council-a sawrkar hruaitute leh Chinland sipaiten ramri atanga lo hmuakin, Chinland chief minister Pathanga, Chinland minister-te leh sawrkar mipawimawh dangte bakah CNF Army hotute nen an inkawm. Camp Victoria thuthmun Chinlung City hmun pawimawh an fang hoa, tlai lamah MP zuitute nen ruai an theh a ni.
Hualngoram government (HPO) a tlawhnaah hian HPO vice president Lallawmzuala chuan lo dawngsawngin, sipai hotute leh Council hruaituten an lo tawiawm a. An hospital leh school hmunhma an lo fanpui a ni.
Heng hmunahte hian K Vanlalvena chuan Myanmar, India ,Bangladesh-a Zofate chu hnam hming hrang leh tawng hrang hrang nei mah ila, hnam khat kan ni, tiin, Pathianin chanchintha hril tura a thlan hnam kan nih avangin kan la ding chhuak ngei ngei dawn tiin a sawi. “Kan awmna hmun leh kan tawng hrang rih mah se, inpumkhatna hi kan vawng reng tur a ni. Unau karah inhriatthiam lohna engpawh awm se, silaia inkah hmanga sawifel loin, inbiakna hmanga sutkian thin tur a ni,” a ti.
Chin leh Mizo chu unau kan nih avangin ramri hung pawh Tiau-ah ni loin, Chindwin lui kamah hung se tih chu an duh dan a ni tih MP hian a sawi a. Myanmar nena ramri chu Tiau a ni loa, Chindwin a ni, tiin, thlang lamah pawh Bangladesh phaizawl thlengin a ni tih a sawi.
Ram leh hnam chhannan mi tam takin nunna an chan tawh leh thalai rual tam tak an pen chhuak chu an ngaihlu a, chutihrualin silai chu a tul tawpkhawkah lo chuan hman hauh loh tur a ni, tia fuihin, administration khawihtute leh sipaite chu lungrual taka kal zel turin a fuih a ni.