TMC an buai zel, MP hlun a bâng, zuitu a neih nual hmel bawk

Mamata Banerjee-i chuan West Bengal-a Trinamool Congress (TMC) MLA-te a kuah beh theih loh hnuah a MP-te pawh an nghing zui mek a, kum 10 zet Rajya Sabha-a an MP lo ni rei tawh, Sukhendu Sekhar Roy-a chuan Thawhtanni khan MP a nihna a bânsan rualin party a chhuahsan a, nghawng a la neih zel hmel bawk.
Kar liam taah Bengal Assembly-a TMC MLA zingah inthenna a thleng a, parliament-a an member-te zingah pawh hetiang lam haw bawk a thlen leh ta a. Sekhar Roy-a a bân hnu lawkah an MP dang panga vel chu a bulah hmuh zui an ni a, an zui ve mai rinna a siam nghal.
TMC Lok Sabha MP 29 zinga 14 chuan Thawhtannia Delhi thleng, BJP hruaitu Suvendu Adhikari-a an hmu zui nia sawi a ni bawk a. Bengal chief minister hi an state-a eptu party chhunga buaina kaihhnawihah ram khawpui ber hi a tlawh nia sawi a ni bawk.
TMC supremo Mamata-i hnena a bân lehkhaah Sekhar Roy-a chuan Bengal mipuiten ‘eirukna hluar tak, hmeichhiate tihduhdahna nasa tak leh a hlawhchhamna leh sector hrang hranga buaina nasa tak awm party chu an hnawl a. Hengte hi zirna, hriselna kaihhnawih, thil siamna, hnathawhna leh dan leh thupek kenkawhah pawh a ni’ tih a tar lang a ni.
BJP fakna thu sawiin, “Bengal chanchina a vawi khat nan vote neitute chuan BJP chu hnehna ropui tak an pe a. Sorkar thlan thar hian an intiam angin Bengal pum hmasawnna leh siam thatna tur hrang hrang kalpui a tum tan a ni,” a ti.
TMC hruaitu hlun hian a bânna hi tun hnaia assembly inthlanpuia chiang taka an tlak hnuah INDIA tangrual inzawmkhawmtir tuma beia Mamata-i Delhi-a a awm laiin a thawn a ni.
Mamata-i din, TMC hi inthlana an chet chhiat hnuah pawl hnihah an inthen mek a, pakhat zawk, Ritabrata Banerjee-a kaihhruai chuan MLA 80 zinga 61-te thlawpna a nei tih a sawi hnuah Bengal Assembly-ah Leader of Opposition (LoP) a ni mek.
Mamata-i hi Thawhtannia INDIA tangrualte thukhawma an intihchak thar lehna tur an ngaihtuah mek laiin Rajya Sabha-a an party hruaitu lawk berin boruak duhawm lo tak a siam leh ta a. SekharRoy-a hi MP 23 vel zetin an zawm dawn nia sawi a ni a. State rorelna ina an inthen hnuah parliament-ah pawh hetiang bawk hi a thleng leh hnai nia ngaih a ni.
Lok Sabha-ah pawh TMC MP-te chu inthen mai thei an ni bawk nia sawi a ni lehzel a, MP 20 chuang zetin hetiang thil hi an thlawp nia sawi a ni tawh bawk a. MP hlun tak pakhat, a chhuak lam kaihruaitu nia sawi chuan sawiho mek a ni tih a sawi nia hriat a ni.
Tunah hian TMC hian Lok Sabha-ah MP 28 a nei mek a, rorelna ina pawl hran anga pawm a nih theih nan anti-defection law hnuaiah MP 22 tal thlawptu neih a ngai a. Rajya Sabha-ah member 13 an awm a, MP pakua thlawpna a ngai bawk a ni.