Future, Metro Boomin leh Kendrick Lamar te hla ‘Like That’ chu Billboard Hot 100 chart-ah No.1 a ni a, he chart-a kar thum a No.1-na a ni ta. Hetihrual hian J. Cole ‘7 Minute Drill’ pawh top 10-ah a debut.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Future, Metro Boomin leh Kendrick Lamar ‘Like That’ hian stream maktaduai 40 leh sales 3,000 a la nei thei a, radio airplay pawh ngaithlatu maktaduai 14 a la nei thei a, hei hi a kar thum nan chart-ah a No.1 pui leh ta a ni.
‘Like That’ hi Future leh Metro Boomin album intawm ‘We Don’t Trust You’ ami niin, he album pawh hi Billboard 200 (albums) chart-ah No.1 te pawh a lo kai tawh a, a album chhunzawmna ‘We Still Don’t Trust You’ pawh April ni 12 khan an tlangzarh leh tawh a, karleh chart-ah he album pawh hi a No.1 leh thei maiin a rinawm.
Hozier hla ‘Too Sweet’ chu stream maktaduai 36.7 tlingin No.4 atangin No.2 a kai a, Hozier hian 2014 khan a hla ‘Take Me to Church’ chu No.2 a lo kaipui tawh a, tihian chart No.2 kai thei hla pahnih a nei ve ta.
Benson Boone hla hit ‘Beautiful Things’ chu No.3-ah bawk a awm leh a, chart No.1 hlui Teddy Swims ‘Lose Control’ chu No.5 atangin No.4-ah a insawn leh hret a, chart No.1 hlui bawk Beyonce ‘Texas Hold ‘Em’ chu No.2 atangin No.5-ah a tawlh ve ta bawk.
J. Cole hla thar ‘7 Minute Drill’ chu No.6-ah a debut a, he hla hi a album thar ‘Might Delete Later’ atanga a single niin, a hla hi Kendrick Lamar-a’n Drake nena a kah dunna hla a chhan letna ang deuh a ni a, J Cole tan he chart top 10-a lang thei hla 13 a neihna a ni. Kendrick Lamar-a’n a kahna hla ‘Like That’ hi tunah chart No.1 a ni mek thung a ni.
Chart No.1 hlui Jack Harlow ‘Lovin on Me’ chu No.8 atangin No.7-ah a insawn leh hret a, chart No.1 hlui bawk Ariana Grande ‘We Can’t Be Friends (Wait for Your Love)’ chu No.9 atangin No.8-ah a insawn a, Future, Metro Boomin, Travis Scott leh Playboi Carti ‘Type Shit’ chu No.10 atangin No.9 a kai thar leh ta a, Noah Kahan ‘Stick Season’ chu No.15 atangin No.10 a kai tar ve leh ta bawk.
Future, Metro Boomin & Kendrick Lamar ‘Like That’-in duhtu a la ngah ber
Get real time updates directly on you device, subscribe now.