MPCC-in chawnghei tawngtai zawm

Mi thahnemngaiten Mizoram tana Rampum Nehemia Chawnghei Tawngtai Programme an buatsaih puala hun hmang ve tura an sawm angin Congress party chuan Thawhlehni khan Congress Bhawan-ah chawnghei tawngtai a buatsaih.
MPCC president Lalsawta chuan, kan ram dinhmun hria a, mi thahnemngaiten Pathian lama tan a tul zia leh Pathian hnena kan fel loh leh dik lohna thupha chawia hun hman an huaihawt chu thil lawmawm leh tul tak a ni, tiin, a taka danglamna thlen thei tura rilru leh thinlung taka Pathian lam hawi a tul tih a sawi.
“Sawrkar tha siam tur chuan Pathian a hmasa berah kan dah zel a tul a, kan thiltih tehna hmanrua atan pawh Bible in engtin nge a tih, tih a ni zel tur a ni. Pathian nen chuan ram rorelna tha hi Mizoram mipui kan pe thei a, incheina atan leh vote zawnna atana Pathian hming lamtu chuan Pathian leh ram mipui pawi a sawi a ni,” a ti.
MPCC vice president Lal Thanzara chuan tawngtai thiltihtheih zia hre lo tan ringtu nih a famkim lo, tiin, “Tih tak taka Pathian autute chu chhanin an awm thin a, kan rama buaina leh harsatna hrang hrang thlengte hi tih takzeta ngaihdam dila Pathian hnena kan thlen chuan damna kan chang thei a ni,” a ti. A langa mawi ni loa, ram leh hnam siamthat duhna tak tak nena tawngtaina nasa zawka neih fo a tul tih a sawi bawk.
MPCC treasurer Dr Lalmalsawma Nghaka pawhin India ram state hrang hrangah Kristian chief minister, Kristian MLA leh minister kan nei nual a. A tak taka Kristian nih tarlangtu MLA, minister leh chief minister engzat nge kan neih a, Pathian ram tana danglamna thlen theitu engzat nge awm, tia zawtin, “Politics field-ah Pathian thu kan sawi a. A tak taka Pathian ringtu tia mite kawng kawhhmuhtu leh rintlak nih a tul,” a ti.
He hunah hian tawngtai thupui siamsa, ‘Zofaten Pathian thu kan awihlohna leh a hming kan tihchhiatna sual thupha chawina leh ngaihdam dil tawngtaina’ tih bakah kalkhawmte atangin tawngtai thupui thawh leh rilru sawi hun hman a ni.