MPCC-in KS Thanga lakah defamation case tintuah

An party atanga bang ta minister hlui KS Thanga’n a banna lehkhaa an party president a tihhminghliauna leh mawi lo taka an party a beihna chu a tul dan angin defamation case siam an ngaihtuah dawn tih Congress party chuan an sawi.
MPCC thuchhuak chuan, Congress party atanga a ban chungchangah Pu KS Thanga chuan a tih phak tawk leh a tih awm tawk a ti nia an hriat thu te, Congress party-ah dinhmun tha a chan lai pawhin party mi mai ni lo, Mizoram mipuiin a mizia chiang taka an hriat a nih avangin, parliamentary secretary leh minister dinhmuna hlangkaitu Congress party a chhuahsan tak beihlet na’na a thuziakte pawh a mizia enin a tih awm tawka an ngaih thu a sawi. ‘Pu KS Thanga banna lehkhaah khan thu diklo leh puhna dik lo (allegation) tam tak a awm a. Khang thu diklo leh puhna dik lote kha kan president tihhminghliau tumna a nih bakah mawi lo taka Congress party beihna a nih avangin a tul dan angin defamation case pawh kan la ngaihtuah ang,’ a ti.
Pathian hnenah Congress party-in Mizoram tan sawrkar tha an dil thin a. Sawrkar tha an dinna turah an tana hnawkte pawh thensak turin Pathian an dil thin tih MPCC hian sawiin, ‘Tunah hian kan tih ni miah loin ‘That Lohtheih Lohna Bawm’ a awm thei lo chu anmahni an insenghawi tan niin kan hria a, Pathian hnenah lawmthu kan sawi a ni,’ a ti.
Congress party hmalam hunah eng anga harsatna pawh la awm dawn mah se, Pathian chakna ringin an president Pu Lalsawta hoin an sutlang zel dawn a. Ram leh hnam rawngbawl an tum dan an chian em avangin sawrkar tha din an tumna kawngah Mizoram mipui thlawpna an ngen tih thuchhuah hian a sawi a. An president-in Pathian rawn chung zela Congress party a kaihhruai dan chu tha kan tiin an ringtawk a; Mizoram tana a hmathlir chu ram leh hnam tana tha, hmasawnna thlen thei tur leh dinchhuahpui theihna tur ni ah an ngai a; sawrkar tha siam turin Pu Lalsawta kaihhruaina hnuaia lungrual taka theihtawp chhuah zel a, zui zel an tum tih a sawi a ni.