MPL champion Chanmari FC

Inrinni zan khan Mizoram Premier League (MPL) 12 khelh a ni a, RG Stadium-a inkhel hmuhnawm takah 1-0 a Aizawl FC hnehin Chamari FC chu a vawi thum nan an champion.
MPL final-ah I League club pahnih; Aizawl FC leh Chanmari FC te inkhel hian ngaihven a hlawh a, entu pawh an thahnem hle. Aizawl FC hi League round-ah tlawm nei miah lova champion an ni a. MPL League round-ah record nei tha zawk an nih vangin Aizawl FC hi champion tura rinkai an ni a, MPL-ah a vawi ruk nan champion an tum viau bawk. Chutihlai hian season hmang tha tak, I Day-a an champion bakah I League khel tura inhlangkai Chanmari FC in hnehna chan ngei tumin tan an khawh ve bawk.
Team hnih ten final boruak danglam bik zia an lantir a, chak tumin an innawr tawn nasa hle. Chanmari FC in goal thun theihna hun remchang an hmu hmasa zawk a, penalty an hmu. He penalty hi Christopher Kamei chuan pet goal in minute 24-naah hmahruaina goal a a thun. He goal hian Chanmari FC a fuih phur viau a, inrintawkna sang zawk nen final boruak sangah an inlan zui theih phah.
Aizawl FC in an si phurh sut tum viau mah se an hlawhtling thei lova, penalty an beisei thlawn bawk. AFC hian hun tawp thlengin an si phurh an sut thei lova, an elpui lian Chanmari FC lakah tlawmin an champion zo ta lo a ni.
Aizawl FC hnehtu Chanmari FC hi MPL-ah vawi thum an champion na chiah a ni. Chanmari FC hi Rochhingpuia enkawlna hnuaiah an khel tha viau a, I Day-ah an champion a, I League khel tura an tlin bakah MPL-ah an champion zui leh bawk. Champion zo ta lo mahse vawi nga champion tawh Aizawl FC chu MPL a champion tam ber an ni zui zel.
MPL Final-ah Aizawl FC hneha Chanmari FC an champion hian season thara I League boruak tur a hril nghal rual. I League-a Aizawl derby a pui viau tura ngaih a ni a. Football boruak a nun thar leh zual a beiseiawm.
MPL 12 khelh zawh takah Chanmari FC si nghak T Zothanmawia a langsar hle. T Mawia hi MPL 12-ah si nghak tha bera thlan a ni a, MPL 12-a player tha berah thlan a ni tel bawk.
MPL Season Awards :
Fairplay Team : Kanan FC
Emerging Player : F Malsawmtluanga (CFC)
Best Goalkeeper : T Zothanmawia (CFC)
Best Defender : Rohmingthanga (Aizawl FC)
Best Midfielder: Lalawmpuia Sailo (AFC)
Best Forward : Zomuansanga (Aizawl FC)
Top Scorer : Zomuansanga (Aizawl FC)
Best Player : T Zothanmawia (Chanmari FC)