Tu nge ‘Mizo Idol’ tur? Neihpuii, Emmanuela & Muansanga?

Tu nge ‘Mizo Idol’ tur?
Neihpuii, Emmanuela & Muansanga?
Mizo Idol season 8 hmawr an bawk dawn ta a, October ni 31 zan khan top 3 finalist an puang a, Vanlalneihpuii, Chamring, Emmanuel Lalremruata, Tuikual South leh Zomuansanga, Dawrpui Vengthar te an tling. Top 3 finalist te hian November ni 4 zanah an intihsiak ang a, November ni 6 zanah grand finale neiin, result puan a ni ang.
Top 3 result puan zanah intihsiak lovin, show pangngai anga kalpui a ni a, kumin top 20-a lang, R Remruatpuia’n “Hmangaih LM” tih hlain show bul a tan a, season hmasa top 20 a lang, Zodini Sailo pawh inlanin, “I Kiangah” tih hla a sa ve thung. Idol veteran Marina Varte pawh inlanin, Idol a tel atanga kum 18-naah Idol stage-ah a rawn perform leh ta a ni.
Kumin top 50 a lang Donita Zorinsangi pawhin stage-ah rawn inlan lehin, Mizo Idol season 3 top 3 finalist Ticos Dara’n a hla chuan ‘Lungmawl Duhsawm’ stage-ah a rawn dinchhuahpui ve leh bawk a, ani hi state pawnah eizawngin a awm bo a, a lo tlangnel tawhna, Mizo Idol stage-ah buai map lovin a rawn inlan leh ta a ni. Lunglei nula Deborah leh Saka te pawh inlanin, an thiam an la theihnghilh lo nasa!
Kum kaltaa Mizo Idol te leh kumin Idol atanga thlan bikte inlan hnuah, LESDE Mizo Idol season 8 star te an rawn inlan a, Zomuansanga leh Remlalvuani ten ‘Intawng leh ngei ang aw’ an rawn tidun hlerh hlerh mai chuan boruak an siam hle a, Sylvia leh Dinsanga ten ‘A zual zel si’ an rawn tidun ve leh bawk a, anni pahnih pawh hi an fuh kim vel khawp mai. Chutah Super Trio hla ‘Dai Ve Rawh Le’ tih ngei mai kha Neihpuii, |hakima leh Emmanuela ten an rawn saho a, show khar nana performance hmuhnawm leh fuh tak a ni e.
Top 3 finalist kan hre tawh a, tu ber nge ‘Idol’ ni dawn tih chu intihsiaka an chetdanin a hril dawn a, kumin hi Aizawl chet that kum a ni thei mai ang em? Zaithiam zawnna reality show Mizo Idol leh Youth Icon kan neihah hian Aizawl a cheng te ‘winner’ an ni khât khawp mai a, kumin ‘Idol’-ah hian top 3-ah Aizawl pahnih an awm a, a tu emaw zawk hi an vanneih kum a ni thei mai ang em?
Idol intihsiak chhunga an chetdan kan hria a, Tuikual South zaithiam, Emmanuela’n chetchhiat tum tia han sawi tur a la nei lo,a tir atanga mipui thlir rawn ni nghal thei a ni a, final-ah hian a chesual viau te a nih loh chuan Tuikual South lamah ‘Idol’ title hi an hawpui thei mai lo’ng maw!
Zomuansanga, Dawrpui Vengthar hian fan base a neih that hmel tlat, a chet fuh loh tum pawha mipui vote (ti mai ila) hmanga stage sang zawk inhlangkai zel thei a ni tlat mai a, mipui hi judge pakhat ang a ni miau si a, social media lama views ngahin Idol nihna kawng a hawn theihna chance a awm ve tlat.
Top 3 finalist-ah hmeichhe awm chhun, Vanlalneihpuii hi a performance kan hre vek tawh, a che fuh em em reng ringawt, Idol hi Chamring lama a cham rih ring pawh kan tam ang a, kan ni deuh fur zawk ang. Mahse, kumin hi Aizawl vanneih kum a nih duh hmel!