MPSC chairman hi bang tura nawr chi a ni lo – JC Ramthanga

Public Service Commission chu India ram danpui hnuaia awm a nih avangin India President-in a ban a nih ngawt loh chuan chairman chu bang tura nawr chi a ni lo tih MPSC) chairman kalchhuak JC Ramthanga chuan a sawi.
Mizoram Public Service Commission (MPSC) chairman JC Ramthanga, IAS (Retd) hi MPSC-a a thawh hun a tawp tak avangin superannuation pension-in May 6 khan a chhuak a. Amah thlahna pual hun hman niin, MPSC member ho, officer, thawktu dang leh Standing Counsel an tel.
PSC chu India ram danpuia chuang, constitutional body a nih angin, chairman leh member-te ruat theih dan leh ban theih dan tur tarlan vek a ni a. Criminal case avanga Supreme Court-in thiamloh a chantir a, bang tlaka a ngaih a, India President-in a ban a nih ngawt loh chuan tumahin chairman bang tura nawr chi a ni lo tih JC Ramthanga hian a sawi a. Tunhnaia MPSC-in beih a tawhnaah thawktute tanrualna lawmawm a tih thu sawiin, chief minister-in press mite hmaah inquiry report-ah MPSC dik lohna an hmuh loh thu leh report chu sawrkarin a pawm tih a sawi chu a lawmawm takzet tih a sawi. MPSC zahawmna humhalh a, a zahawmna leh rintlakna vawngnung zel turin officer leh staff-te a chah a ni.
Chairman kalchhuak tur chuan kum hnih vel he hna a chelh chhunga MPSC hmasawnna leh hlawhtlinna – building tihchangtlun, officer leh staff-te service sileh state dangte tih dan tha entawn chunga MPSC examination kalphung siam danglam ngaite tifel tura theihtawp a chhuahnaah MPSC secretary leh officer-te bakah staff-ten an tawiawmnaah lawmthu a sawi a. Heng hmasawnna hnathawh hi lehkhabua siam a ni tih a sawi.
JC Ramthanga hi kum 1989 ah IAS a lut a. Manipur cadre niin, Manipur state sawrkar hnuaiah kum 25 leh Mizoram state sawrkar hnuaiah kum 8 a thawh hnu ah a service a bahlahna awm loin 2022 May 31 khan Mizoram sawrkar atangin pension-in a chhuak a. 2022 June 21-ah MPSC chairman hna a zawm a ni.