MPSC hna lak dan chhui tur hi…

Mizoram Public Service Commission-in February ni 1, 2024-a result a tihchhuah tak Combined Competitive Examinations kalpui danah thil fel tawk lo leh chhui chian ngai thil a awm niin MZP Gen Hqrs chuan an auchhuahpui a. He thil thleng chungchangah MZP lamin MPSC Chairman bang turin an nawr a, chief minister chuan MZP hruaituten a hnena an thlen leh an ngen angin he thila dik lo a awm leh awm loh chhui chiang turin IAS officer pension M Lalmanzuala ruat a nih thu leh, ni 7 chhunga report pe tura tih a nih thu April ni 15 zan khan Khawzawlah a sawi chhuak a.
MZP lam hian thil dik tawk lo a awm ngei nia an hriat avangin an nawr na hle a, MPSC Chairman insawifiahna chu lungawithlak loh an ti a; chief minister hnenah thil awmzia an thlen a, chief minister-in chhui chian a nih tur thu tunhnaia a sawi chhuah tak avangin, tun atanga ni sarih velah chuan chhuichianna report pawh hriat theih a ni dawn ta a ni.
He thil thleng chhui chiang tura ruat Pu M Lalmanzuala hi tunhmaa chief secretary te lo ni tawh, a hun laia sawrkar sum cheng vaibelchhe tel bothlau tur sawrkar sum bawma hnuk let leh thei khawpa mi dik leh huaisen a ni a. MPSC chairman te pawh lo ni tawh a ni bawk a; thil kalhmang hre tawk tak a ni a, ani kuta chhuichianna dah a ni hi, a lakah mipuiin beiseina sang tak an nei dawn tih a hriat theih mai awm e.
Pawl hrang hrang leh political party hrang hrang bakah kohhran hrang hrangin eiruk leh hlemhletna dona kawng zawhin, tawngtai rualna an nei mup mup thin a; hei hian Mizoramah eirukna a nasa em em a ni tih a finfiah nghal a. Tute nge eiru chu? tia mal man fak tur erawh an tlem em em a, hei hian eirukna leh hlemhletna a nasatzia a pholang chiang deuh deuh zawk a tih theih ang. Eirukna leh hlemhletna a nasat chuan man chhuah chur chur awm tak a ni a, man chhuak thei lo kan nihnate hlei hlei hi eirukna a nasatzia finfiahna tha tak a ni thei zel awm e.
Dikna hi rahbeh ni thin mah se, a tlu hlen ngai lo; thawh chhuah hun a nei ngei ngei thin. Tun tuma thil dik lo a awm leh awm loh chhuina turah pawh hian, dik chu dik, dik lo chu dik lo tih hriat theih ngei ni se, fifty-fifty tih vel, dawihzep thutlukna anga ngaih theih ang kha chu mipui hian hre nawn tawh lo hram ila, a duhawm takzet a ni.