MPSC-in “tihdikna” vawi 66 siam tawh

Mizoram Public Service Commission (MPSC) hnuaia hna lak chungchangah tihdikna/siamthatna/belhna a awm fo a, 2023 December hnuah chutiang chu vawi 66 a awm tawh.
2023 December hnuah MPSC hian corrigendam vawi 24 an siam tawh a, addendum vawi 29 leh revised notification vawi 13 an siam tawh a ni.
MPSC buatsaih exam pawh thulh a ni fo a, a hun sawn hlat te pawh a awm fo. Result siamthat pawh a awm tawh thin.
2023 December hnuah vawi 17 exam an postpone tawh a, vawi khat an cancel tawh bakah reschedule vawi khat a awm tawh. Result vawi hnih an siamtha tawh bawk.
Exam hun sawnah hian Lok Sabha inthlan vanga sawn pawh a awm a, khuarel chhiatna vanga sawn pawh a awm. Syllabus dawn kim loh vanga exam hun sawn a awm a, MCS Combined exam-a MPS thlangte tana PET neih hun tura ruat leh Mizoram Premier League a insut buai avangin sawn a ni. Online portal a buai avanga exam hun sawn a awm a, entomologist lak tumin qualification leh specialization chungchangah hriat chian ngai a awm avangin interview neih hun tur sawn a ni.
Result siamthat pakhat chu 2026 May-a mi a ni a, Mizoram Engineering Service (MES) laknaah a ni. PHED hnuaia MES officer tur laknaah mi pasarih lak turah mi pariat lak a ni a, hei hi siamthat a ni.
MPSC hian sorkar ding lai hnuaiah direct-in (direct recruitment) sorkar hnathawk tur mi 765 a la tawh.
Group A-ah mi 291 lak a ni a, Group B-ah mi 464, Group C-ah mi panga, Group D-ah mi panga an la. Limited Department Examination hmangin Group A-ah mi 75 lak an ni tawh a, Group B-ah mi 90 lak a ni tawh bawk.