MPSC Reform Committee dinin inrem Thla hnih chhungin report thehlut ang

Mizoram Public Service Commission siamthat ngiata Mizo Zirlai Pawl-in hma a lakna kalzelah Nilaini khan sawrkar aiawhte nen an inbiak hnu ah MPSC Reform Committee din rawtna chu sawrkarin ‘order’ a tihchhuah tak avangin an inrem fel a. Committee hi a thil zir leh rawtna a neihte thla hnih chhunga sawrkara thehlut tura tih a ni.
MZP hian MPSC hna lak dan phung siamthat phuta lungawi loh an lantir bakah thawktute pisa kai tur hial an dan hnu ah, Nilaini khan Department of Personnel and Administrative Reforms secretary Udit Prakash Rai kaihhruaiin MPSC hotute leh a kaihhnawih sawrkar hotute bakah MZP lam leh MPSC kaltlanga hna zawng lai harsatna tawk aiawhte an thukhawm a. DP&AR secretary chuan Mizoram sawrkarin MPSC Reform Committee din a tum thu sawiin, chief minister hnen a thlen tawh tih a sawi.
MZP hruaitute leh MPSC-a harsatna tawk zirlaite chuan, MPSC-a buaina hrang hrang chungchang ni hnih chhung ‘Peaceful Protest’ neih a nih hnu leh ni thum chhung MPSC Pisa kai tur dan a nih hnuah, sawrkar aiawh thuneitute hoa an inbe thei chu lawmawm an tih thu an sawi a. Chutihrualin MPSC Reform Committee dinna order chhuah a nih hma chuan MPSC thawktute pisa kai tur chu dan chhunzawm zel an tum tih an sawi a ni.
Nilaini tlai khan MZP ngenna, MPSC Reform Commission/ Committee din rawtna chu DP&AR changtu chief minister chuan a pawmpui ta tih MZP hian sawiin, a hmingah “Committee to review the recruitment framework and process for public recruitment in the Government of Mizoram” tih a ni a, hei hi lawmawm an tih thu an sawi. MPSC siamthat hnatlang an koh chu, order chhuah a nih tak avang hian pisa kai dan zel an tum pawh an titawp ve nghal tih sawiin, he Committee-in a tuna buaina hrang hrang an tarlan chu felfai taka chinfel a nih theihnan Committee member ho a ngen tih a sawi bawk.
Reform Committee-ah hian chairman-ah DP&AR secretary, member secretary-ah DP&AR joint secretary, member-ah MPSC secretary, Law & Judicial addl secretary, GAD addl secretary, Home add secretary leh Finance addl secretary an tel a. Committee hian tul a tih angin a kaihhnawih officer dang emaw hetiang lama mithiam bik emaw member-ah a ruat belh thei anga, hma a lak dan tur a duang thei bawk dawn a ni.
Committee-in enfiah tura tih zingah, MPSC dan leh inkaihhruaina awmsa, sawrkar hna lak dan, a kalphunga inhnerem lo lai endik leh thawktu indaih lohna avanga langtlan leh felfai taka hna lak kawnga harsatna awm thei; hna diltute inziahluh dan kaihhnawiha siamthat ngai nia hriat; hna lak dawna tih dan hrang hrang kalpui chhoh dan endik; result siam leh puan chhuah dan bakah candidate lungawilote lo dawnsawn leh an harsatna enpui/sutkian sak dan tur tha zawk; hna diltu zawng zawng an len vek theihna tura kawng sial dan leh tul dang nia an hriat pawh an hma tur zingah hian a tel a ni.