MINECO-a State Resource Centre for HIV/AIDS building thar sakna tur lungphum chu Zirtawpni khan Health & Family Welfare minister Dr R. Lalthangliana’n a phum.
Minister chuan State Resource Centre for HIV/AIDS tiin a hming vuah ni mah sea, a nihna takah chuan MSACS office building tur a ni tih a sawi a. Hun rei tak office nghet nei loa an insawnkual sek hnua hetianga hmun nghet an nei chu lawmawm a tih thu a sawi.
MNF sawrkar hmasa khan khawpui tawt zelah sawrkar office hmun tur bik neih a tul tih ngaihtuahin tuna MINECO hmun atang hian harsa takin Assam Rifles sawnchhuakin, sawrkar office hmun tur a ruahman a, engtik niah emaw chuan Health department hnuaia thawktu hrang hrangte pawh helai hmunah hian an la awmkhawm theih a beisei thin tih Dr R. Lalthangliana hian a sawi.
Report-a tarlan danin, he building sakna atana sum ruahman chu cheng vaibelchhe 4 niin, contract aggrement amount chu nuai 392.23 a ni. Chhawng 4-a sak tur a ni a, sak phalna AMC atanga hmuh a nih hnu ah 2023 January 24 atang khan hna tan a ni. He Centre hi Ministry of Development of North Eastern Region hnuaia North East Special Infrastructure Development Scheme fund hmanga sak a ni.
MSACS office tur building sa dawn
Get real time updates directly on you device, subscribe now.
Prev Post
Next Post