MSL Season 9 a tiak ta! (Zarkawt BCA-in a \um 5-na’n nomawi an hawn e) – |pa Bunghai

R. Dengthuama Hall-a MSL Finals game 2 tang tak karah 1st. quarters minute sarih chhungin BCA leh TBL lama point awm zawng zawng neitu chu tualchhung tlangvalte an ni; hei hian MSL-a inkhel hmuhnawm chungchuang chhawpchhuaktu chu hnamdangte ni bik loin Mizo ngei an ni tih a pholang chiang hle!
Finals Game 2 thlirna
Best of 3 series hmanga inelna final-ah hian game hmasa zawk BCA-in an lak tawh avangin thapui nen TBL hi an rawn thawkchhuak a, club pahnihte hian chak ngei an tum avangin an defense a khawng dun hle.
BCA Punjabi palian Amrit pawh game hmasa zawk angin a tal thei bik der lo.
TBL coach Ahruaia game plan fing kan hmu a, Eddie-a tharumin he palian, Indian captain hi a dang leh thin chuan awmzia a nei thui hle!
|hazuala leh an mi hang Keyes an inthlawp tha viau a, Lsa’n dam dupin pa chak, Thianga talna turin hmunawl a lo siam karah basket a nei leh thin bawk, inkhel inhnehtawk tak a ni.
MSL 9-ah hian Serchhip val, Big Mike-a’n khelhna hun a neih tam tawk loh a lang a, finals game 1 leh 2-ah a che hlei thei lo – ani hi transfer boruak tingaihnawm zuitu tur a ni mai ang em?
TBL foreign player tawngkam duhtui lo tak, mahse, court chhunga dan harsa tak ni thung lawi si an foreign player, Keyes hi Amrit-a’n khati tak maia che thei mang lova a siam khan TBL puipa lam ngaihtuahna thar a siamsak ta a nih paw’n, anni ang club tha tih awm tak a ni ang.
BCA lamin hun khirhkhana mamawh chhanna an kawl, an senior player Zarkawt tlangval Sangkima a hun teah a rah nawn leh a, 3 pts. a nei zawn zat leh palian kara rebounds a chang nawlhte khan BCA phurna a thlen chiang ngei mai.
Ramthar tlangval kawlh leh huaisen, Zonuna’n 3 pts. tum li lai a nei zui phei chuan mipui boruak a chawk ‘hot’ chiang teh e!
MVP-a thlan zui tak, R-a theihna leh thiamna hmuhhmaih theih a ni lo. Game tang tak karah MSL 9-a player tha ber a nihzia a pholang.
Huikhawmtu tha Matthew Sailo, BCA captain-in points inhnaih lutuk tur vengin defense leh offense-ah ha a thawhhlawk hle a – best defensive player atan a phu ang ngeiin thlan a ni zui.
Game 1 angin a duhtawkin Amrit tal thei bik lo mah se BCA tan a tangkai leh viau. Hun tawp dawn lama mipuiin MVP tia an koh rawn, Lalrina Renthlei erawhin mahni hmasial lo takin team tan a khelh rah chu BCA champion zui tak kawngah a pawimawh tak zet.
Mimal chawimawina aiin team chawikan duh zawk, tum thum lai MSL-a MVP atana thlan Lalrina Renthlei hian naupang zawkte entawn tur a hnutchhiah hi a hlu e.
Inkhel chhehvel
Finals game 2 en tura ticket lei tum intlar sei takte khan tualchhung tlangval, an chipuite inkhel an va thlawp tha e aw – mahni hnam inngaihsan tawn nachang kan hre chho zel tih infiamna huangah hian a thleng dik leh thin.
Boruak han alh leh phat thin karah erawh Amrit-a chezia mawlh kha – professional player a nih thu leh street player ang maia tawngkam chhia (trash talk) hmanga elpuite chaltlai taka tawngkhum siah siah tul a ti lo!
Court chhunga tumpuite rilru pawhpenna’na Keyes-a’n Amrit-a ep chiaha a khawsa leh tlat thung thinte khan MSL danglam leh dangdaizia a tarlang.
Kan tualchhung tlangvalte zingah TBL Thianga theihna sanzia te; BCA head coach rilru fima team enkawlin a chhawrzia te; hloh chunga Mizo thalaite tana club tha fal nalh dintu, BCA leh TBL neitute zahna chibai kan buk e.
Mimal points leh a dangte chu dahtha ila. Thui tak thlira Zofate rah chin leh chim chin a san zelna’na MBBA leh Zonet thathawh nasatziate hi Mizo basketball ngainatute chuan an hai lo tawp ang.
BCA-in tum nga MSL-a an champion hi lehthaltu an la awm thei a, MSL season 6 leh 9-a hneh loh tawng lova BCA an champion record ropui tak hian eng chen tak daih ang i maw…
The Aizawl Post infiamna huanga zalen taka MSL thlirna thai tura hmun min kiantu, he chanchinbu enkawltute chungah hian ka va lawm em aw – Mizo basketball hmangaihtute thinlung a lawm e.
Dawhtheih leh thawhrim hlutzia inzawt ta ila – Most Valuable Player (MVP) lawmman dawngtu, Bungkawn tlangval R. Lalnunpuia’n (R-a) lawm avanga mittui tla chunga a lawmman dawn a kuah vawng vawng kha kan inhrilh ru sap hlawm ngei ang.
Zofate’n India ram pumhuapa basketball hmanga kan hniak hnutchhiah hi a ropui mang e.