MSL X final: Mizoram basketball thununtu Khatla TBL vs Zarkawt BCA inlan zan!
MSL X final: Mizoram basketball thununtu
Khatla TBL vs Zarkawt BCA inlan zan!
Sharda University Mizoram Super League X finals kan lo chuangkai ta der mai! Zanin dar 8:30 hian MSL vawi thum nomawi chawi tawh Khatla TBL leh MSL nomawi tum nga zet chawi tawh Zarkawt BCA-te’n Mizorama basketball inelna sang berah chak zawk nih tumin an rawn inlan dawn a, R. Dengthuama Indoor Stadium lamah mipui an fuankhawm dawn. |hutna tha chan duh tan kal hma a ngai ang.
MSL X leh century chhehvel
Tun tum inelnaah hian team point za chin lut thei club pali an awm a, chu’ngte chu:-
1. Zarkawt BCA – Vawi 3
(108, 100 & 115)
2. Khatla TBL – Vawi 3
(105, 100 & 109)
3. Saron BC – Vawi 1
(107)
4. Zemabawk BC – Vawi 1
(107)
MSL X league round inkhel tum 24-na (match no 24)-ah khan Zarkawt BCA chuan Champhai BC chu 115-75-in an hneh a, point 40 zeta an sawpna kha inhnehna sang ber leh MSL X-a point sang ber a ni.
Inkhel inhnehtawk ber erawh chu semi finals game 3, match no 37-ah khan hun pangaia Khatla TBL leh Zemabawk BC inhnehtawk tum kha a ni – hun pek belh (over time) a zawh hnuah pawh point hnih chiahin Khatla TBL-in 109-107-in hnehna an chang hram!
Tun tum inelna hi a hmasa lam, match no 11-ah khan Champhai BC chuan match khata point tlem ber 61 record an siam a; Electric BC lamin point 62 chauh match no 23-ah khan an lo nei tawh bawk – he team pahnih hian hemi tuma point tlem tak an neihna inkhelah hian Khatla TBL an hmachhawn ve ve.
MSL X finals thlirlawk thuakna
Zanin final match best of three series bul tanna game hmasa berah hian khelh that ni-ah chuan point za harsa lo taka nei thei mai team pahnih kan hmu dawn a; Khatla TBL lam hi an match hmasa lam thlirin defensive game phochhuak tha zawk an ni tih a lang.
Hetih rual hian Mizo basketball uluk taka chip malh malh peih chuan Zarkawt BCA player Zonuna hi inkhel khaiding lawptu, an tumpuite nawrna kawnga tangkai lawrlak a nihzia an hria ang – finals boruak sang takah erawh a puitlinna leh zaidam a tarlan a fuh ang.
MVP ni lai R-a erawhin a season tha ber a hmang lo – fiahna a hmaah a awm e.
Lalrina Renthlei hian a tawnhriat game sangah a chhawr – match official thutlukna erawhin a game a nghawng buai lohna’n hahdam a mamawh.
BCA defense phui taka venghim thin Mattew Sailo hi kum tam tak an ban pawimawh a ni tawh a, a tangkai anga fak hlawh ngai lo hian a teammate-te a uap that a tul.
An foreigner Cunningham hi innghah ngamna tlak a ni a; Gujarat pa sang Sahaj Patel a nawi loh a hun ta.
Inkhel boruak hun tlem te chhunga chawk danglam thei Tamilnadu kristian tlangval Justin (the silent shooter) leh an tualchhung tlangval dangte hi ngaihthah chi an ni lo – inkhel hmasa lamah an theihna an pholang fel vek tawh. Champion nomawi kawl lai Zarkawt BCA fans leh an khuangpui vawtute tan phur zan ni tak maw?
Khatla TBL hi semi finals lamah tawlh thluin thochhuak zo lo tep dinhmuna an din laiin an lamah vanneihna a tang khawng tlat – an kum tha a inherchhuak a nih pawhin a mak lovang!
Captain |hazuala hi player inthunun thei zet a ni a, semi finals boruak sanga a tang ulh kha mak tak a ni – a insiamthat hman erawh a rinawm.
Thawm nei ring hluai lo Lsa leh MVP ni pha hial thei Emmanuel-a tangkai leh theihna sanzia hi! An foreign player James hi khawi hmunah pawh ven ngai khawpa thiam thil kawl kuh tul a ni – a chhe thut lovang.
Tharum ngah Thianga duhthala a tal tawh chuan dan theih a ni lo – a shooting erawh a panna lai a ni.
Khatla TBL-in an tumpuite laka thluak an vawrh apiangin Yadu (Y. Singh) an rawn thehchhuak thin – luh thelh thin mah se mihring man thelh chu a nei khat khawp mai!
Team tha Khatla TBL squad-a awm pha chu an nep thei lo tih a nih thin kha.
Hoops Mania Time Out
Mizoram basketball chhungkuaa hming lian leh hriat hlawh thiau – coach pahnih Mapuia leh Marc Tetea bakah inkhel viltu Kca leh Afela te hi inkhel kar lakah an chevel mipui mit fukna a ni nasa zual dawn.
Ngaihthat thlak loh khawpa thu awmzia an inhrilhfiah kawnga rei tak tak thu pawhchah mai theih ‘delay’ a nih vaih chuan – inkhel zawhah phun thawm ri a ring dawn!
Club lian pahnih hi match official lam tan an inkhel ham hi hna chakawm a ni lo – referee-te hna hi second rei lote chhunga thutlukna siam zung zung tul a ni si a, tul lova player lamin pressure an pek chhen hian famkim lo mihring ve bawk ni hek, an dinhmun hi thui leh thuk tak ngaihtuahna senpui a ngai ve bawk a nia.
A thiam leh phu zawkin hnehna chang rawh se.