MSL X: Khatla TBL barakhaihtu Zemabawk BC!
A hming chu Rozama – Super Mario!
Ngai teh, ‘au rawh u’ tih a ngai lo. Hun tawp dawn second 18 ah thil thleng mak a awm!
Dangdai leh danglam, ngeiawm si lawmawm tel bawk si bakah mipui ding suau kut beng ri leh khuang ri ring tak a thleng – Mizoram basketball history-ah theihnghilh tawh ngai loh tur Rozama kutah Khuanu’n magic a dah a, Khatla TBL thinlung chu chemte a vih ang maiin a na ang – a chiang!
Point khata hma hruai mek Zemabawk BC tan 3 pts line pawn lam, Khatla TBL bench hma tak atangin Kanan tlangval Rozaman ball a hloh tep chu shot clock zawh hma hretin talbuai zet mah se, engtin tin emaw a vawm chhuak a – a lut – game over!
He thil thleng hi Sharda Mizoram Super League-ah a ni. Match riat zet chak tluang lai Khatla TBL chu an tlawm ta – Zemabawk BC in 94 – 89 in hun tawp dawnah lehthalin hnehna an chang.
Semi finals hi tarlan tawh thin angin best of three series a ni a, match hmasaa an tlawm tawh avangin Zemabawk BC tan ‘thih leh dam’ inkar ni tawh hek le – an mamawh defense lamah nasa takin an insawrbing nasa zual sauh a – an lut thei a, a dan beh lam hi an hna awmchhun a ni!
Match hmasa lam, semi finals hma zawnga khel tha mar pat Delhi tlangval N. Beniwal a nawi deuh hlek thin tih lo chu Zemabawk BC danglamna hmuh tur a tam – chung zingah chuan an supporter rualte rawl ri ring tak awmze nei kha sawi hmaih a thiang lovang!
Thlawptu rual pungkhawm
Inkhelhna hmun court side zawng zawng deugthawah Khatla TBL fans an thu a; mahse, thawm chhuah ring zawk erawh Zemabawk BC fans an ni!
An players thutna hnungah ring takin khuang an vua a, an au a, tawngkam ngeiawm deuh hlek an thlawh chhuak zeuh zeuh a, mipui nui thawm ri leh hak thin boruak tialh zualtu chu hlawm khata thukhawm khang Zemabawk thalai thawkchhuah thukhawm te kha an ni!
Anni rual khan an player tha ber Perkins Jr. phurna an siam sak a, an captain cool super mario Rozama tan rawn hlawhna zunzam an ti zam zual chiat bawk!
A pawimawh ber chu an au rawl zawng zawng leh inkhelh ban hnu, R. Dengthuama Indoor Stadium kawta an chak hlim thawm kha Los Angeles leh Dallas khawpui tan a ni lo – an pianna, seilenna, tual an lenna, an veng Zemabawk tan a ni – hei hi thil hlut zawng (value system) tehfung dik chu a ni.
MSL X ah club supporter an inlan tha tawk lova; mahse, Zemabawk BC tantu intelkhawmten fans thiltihtheihna an rawn lantir ta!
Zemabawk vengchhung leh an fans hmun hrang hranga mi te an insuihkhawm that nawn leh a, free-throw shooting laia awmze neia an au rual leh that that chuan Khatla TBL tan semi finals game 3 hi a khirh fat ang!
Hei erawh hre tel ila – engtik lai maha fans nei chhe ngai bik lo Khatla TBL hi club ngialnghet an ni tlat!
An club tha tichak tura an rawn inkhawrhchhuah that phawt chuan, Mizoram basketball khawvel inzarpharhna tawp rak thlenga tantu leh thlawptu nei an nihna a lang nawn leh ang – a bikin an veng mipui an rawn thawhchhuah that a ngai ta – kai thar Zemabawk BC hneh loh nawn hi basketball inpui tia inchhal Khatla veng tan a na dawn lutuk!
Semi finals 1, game 2 chu!
Inkhel tanna hamrik rik ruala kan hmuh chu Khatla TBL captain bawk a ni, he |hazuala hian point 25 lai a nei a, a kianga a teammate-te tihsual palh hau leh khak mai lova a fuih sauh sauh thin khan team inpukhatna a siam – Khatla TBL fachuam ni awm reng a ni.
Rookie Emmanuel-a (21 points) hi 3 pts a lut thei em em a, khawi hmunah pawh a hlauhawm vel vek – a tlan chakna leh a chet ranna mawlh hi team tan a hlu zual thin.
An foreigner James (18 pts) thatzia hi sawi nawn a ngai lo; mahse, duh thala che tur erawh Perkins Jr. in a dang chat thin a – chinfel ngai hna coach Mapuia tan a pung tlat.
Game boruak sang takah Khatla TBL player sek leh tharum ngah Yadu (Y. Singh) a nikhua lo zeuh zeuh a, a thinchhiat rah kha zet a seng a, tul lovah buaina a insiam chawp!
An khel chhe lo a, Khatla TBL hi hneh theih an ni tih a chiang hle. Heng buaina karah erawh hi chuan Mapuia hi chingfel tura koh manhla ber tur tawnhriat nei tha a nia, ani hova Khatla TBL semi finals game 3 hmachhawn erawh hi chu a phurawmin a chakawm ngawt ang!
Perkins Jr. hi Zemabawk BC chanchin khuh hawn nan hmang teh ang – keini Hoops Mania lam hian thiam kan ti si, thinchhia kan tiin sikul tha chhuak a nih kan ring lo!
Amaherawhchu, he pa sang ria zet hian kan hmui min hup sak tlat!
Pathianni chawhnu inkhawm ngai lo tih hriat mah se, basketball thiam tehna tehfungah erawh MSL X a hnam dang rawn inlan zinga thiam ber a ni tih hi kan thup thei ta lo – Khatla TBL lama point 47 teh meuh mai minute 35 chhunga khung thei hi Zemabawk BC chhandamtu a ni – Perkins Jr. hringtu pa Perkins Sr. hian fapa a nei ‘cial teh e.
He team-ah hian Tyson tih hmingpu a awm bawk a, a defense kha a hmingthatpui e.
Tlanhlua 3 pts tumhnih kha an chakna kailawn inchherchhuan chhoah a tangkai hle a, he team hi sawi duah a ngai lo – thawkho tha se an chak zel a ni mai.
An coach Sangpuia thluak leh a pheikhawk sen (boot sen) hian MSL finals thlenpui thei tak maw – an 6th man an supporter-te kutah thui tak an innghat tel e.
Hoops Mania Time Out
Zanin hian engkim chinfel a ni dawn a, he team pahnih hma lam hi a chiang dawn ta e!
Player leh inkhel entu an tang si a, match official tan thutlukna siam fuh loh a mualpho thlak theih hun bik kan thleng ta – kan referee te hi state danga fehchhuak thei hial khawpa rin kai an ni tih erawh hre tel ila – anni lam pawh fimkhurin tang sauh sauh se.
MBBA Sr. Vice President Dr. Lalrinawma chuan, “Inkhel boruak sang tak chhim tur a kuh leh ta tul, hmaih a thiang ta lo!
“Semi finals 1, game 2 bikah mipui inkhel entu boruak ti so hulh hulhtu awm kha han tuihnih ve ta ila. “Rozama hi a pumrua en ang ngawt a ni lo tlat! Tun MSL-a an match-te kha thlirlet ila khelh chhiat a nei mang lo ti ila kan sawi sual lo ang. Pa lian karah a zam lo a, mak tak mai hian ball a luhpui thei tlat zel!
“MSL-a Indian senior player rawn khel pawhin, ‘hetiang player mi bik hi ka la hmu ngai lo’ a ti thlawt!
“Nizan hmasa game inhnehtawk lutukah khan game result inthlak dawrhna basket a rawn nei te kha pui tak a ni! Khatiang kha thil hmuh zen zen tur awm lo a ni – a mak tih mai lo chu sawi tur a awm lo!,” tiin The Aizawl Post Hoops Mania a hrilh.
Semi finals 1, game 3 en tur tan ticket ngaihven ran a fuh ang.
Semi finals kan rikpui hluai lai hian relegation battle lam thawm pawh a lian viau.
Saron BC in 83 – 81 in Bungkawn LBA chu hnehin 2 – 0 in best of three series an la.
T. Lalhriatzela (Tea) chuan point 20 neiin player of the match lawmman a hawn.
MSL top 4 club hiala inhlang kai pha thin Bungkawn LBA chu D league-ah an tla thla ta a; Saron BC erawhin an coach Lana hovin Champhai BC leh Electric BC-in best of three series an khelh meka chak zawk nen MSL-a cham chhunzawm tumin an inhmachhawn leh ang.
-- Advertisement --
MSL Knockout Round
April ni 12, Inrinni zan
Semi finals 1, game 3
Khatla TBL vs Zemabawk BC (8:30 pm)